U Montri ka sorkar pyrdi wa pait ya ka chnat Minority Affairs, u Mukhtar Abbas Naqvi da ong u wa ym em thaw i rukom pyrkhat kam ka Taliban “Talibani Mentality” hajrong i hok ki kynthai, i burom, i laitlooid, i pynkup bor wa i man ryngkat ki kynthai hapoh ka ri. Ya ini da ong u ha ka yalang lehkmen ya ka “Minorities Day” wa pynman da ka National Commission for Minorities, NCM, ha New Delhi ha ka 18 tarik.
U Naqvi da ong u wa kitu kiwa pyrchah yeiwa sih wa wanrah da ka Triple Talaq lane kiwa pyrchah yei pyndooh yei khanglaad ya ki kynthai Muslim wow leh Haj deiwa lai wa ki Mehram wei katni da pynawri ki heiyatoh wa i snem wa da hoi wow bia noh ki kynthai, wei kini toh kiwa da im-ja nei lai yaleh pyrchah.
Da ong u wa ha India em ko boon ki jait niam ha iwi i liang wei ha iwi i liang leh boon ki bru wym ngait Blai kiwa da im dei burom deilang wa i jooh i hok kam kiwi.
Chooh chooh da ong u wa ka National Commission for Minorities toh kawa yada yei hok wa i bha i miat kiwa khian paaid hapoh ka ri.
Da khana u wa ka sorkar nadooh u 2014, da e Scholarship ko cha kamwa 5 klur ngut kiwa dang lai puræ na ki 6 tylli ki khian paaid kiwa da tipmit- Parsi, Jain, Buddhist, Sikh, Christian wa Muslim. Wei kamwa 50% na kiwa yoh myntoi toh ki kynthai. Da ong u wa ini da wanrah ko yei duna bha kiwa dam skur chiteiñ por da kiwa khian paaid khamtam ki kynthai Muslim. Kiwa dam skur chiteiñ por ki kynthai Muslim da em ko palat 70% chwa u 2014, wei katni da hiar ko cha kamwa 30%. Wei i thong toh wow hiar cha 0% ha ki por wow wan.
