U Montri Rangbah ka jylla, u Conrad Sangma ynne hawa jubab yeiwa kylli u MLA ka Nongkrem, u Ardent Basaiawmoit hapoh ka yung dorbar heiyatoh wa kiyi ki bru wa ye u man kam ki VIP hapoh Meghalaya, da pyntip u wa katkam ki kot ki sla (Classified Secret Document) wym hoi u khana paidbah yong ka Security Arrangement for Protection of Individuals kawa tip kam ka Yellow Book yong ka Ministry of Home Affairs ka sorkar India kamtæ ym ye wow khana yei pyrtuid ki bru wa em hapoh kani ka kot.
Wei hapoh Meghalaya leh da bood ya ki kyndon ka Ministry of Home Affairs wei ym em kam kitæ ki VIP tangwa da yabhah ya ki jar jiar ki kyrdan kiwa man ki bru wa emkaam yei yada heiwa da em ki waroh 103 ngut hapoh ka jylla.
Hapoh ka Z+ Protected Person da em 2 ngut, hapoh ka Z Category Protected Person da em 10 ngut, hapoh ka Y+ Category Person ym em, hapoh ka Y Category Protected Person da em 19 ngut katwa hapoh ka X Category Protected Person da em 72 ngut.
U Ardent da kylli u leh yeiwa dang em ki bru wa pynemkaam ya ki kari kiwa biah pyndoom (Black Film) ya ka yit kari hadooh wow booh Siren ha ki kari wot hadien wa da khang ka Supreme Court, neiliang u Conrad da ong u wa oo ha ka kari samen yong oo leh ym em biah u ya kini ki Black Film wei ya kitu kiwa leh pyrchah u pynchitom ya ki.
