Ka Nagaland deilang wa kiwi ki jylla ynne da thap Vote MP Election ko tangwa ha ki 6 tylli ki District kani ka jylla ym em wa wan thap Vote neidaw i dawa jylla.
Ka seiñ wa tip kam ka Eastern Nagaland People’s Organisation (ENPO) da kyntu ko ya ki paidbah ki 6 District wym toh u lai thap Vote kam ka dak pyrchah.
Ka Additional Chief Electoral Officer ka Nagaland, ka Awa Loring da ong ko wa kiwa kreh Election da em ki ha waroh ki 738 tylli ki Polling Station ha kini ki 6 District.
Ha kini ki 6 District da em palat 4 lak ngut kiwa thap Vote kiwa da pynyoo yei ya krehlang waka ENPO heiwa hadooh 1:00 waje i sngi ym em wa wan u thap Vote.
Ka ENPO da dawa ko da ka jylla wow tip kam ka Frontier Nagaland Territory nadooh u snem 2010 wei kini ki 6 District toh ka Mon, Tuensang, Longleng, Kiphire, Shamatore wa Noklak kiwa da kam ki toh kiwa da chah ieh mylliñ ha waroh ki liang wei kani ka thaaiñ toh kawa em 20 tylli ki chuki na ki 60 tylli hapoh ka Nagaland Assembly.
Ka ENPO toh kawa kynthup lang ya 7 tylli ki jaitbru ri-loom hapoh yong ka kitæ ki Chang, Khiamniungan, Konyak, Phom, Tikhir, Sangtam wa Yimkhiung kiwa man kam ki bru wa dang sahdien (Backward Tribes).
Ka ENPO da pynbna ko da ka “Public Emergency” ha ki 6 District deiwa ong wym chah ya kiwon kiwon ki seiñ saiñhima wow wan yalap ki ya kani ka Lok Sabha Election.
U Chief Election Officer ka Nagaland da phah Notice u cha ENPO neidaw wa pynthut ko yei pynman yaka Election deiwa tuklar yei hok ki bru wow lai thap Vote deiwa laitlooid wei da paan pynche iyi i daw wym pynchitom ki katkam ka Section 171C ka Indian Penal Code.
Ka ENPO ynnin u snem leh da khut ko wow dam u thap Vote haka Election MLA tangwa da pyndam ko yeini hadien wa yoh yei kular na u Union Home Minister, u Amit Shah.
Hajrong wa pynslem ka sorkar India wow seiñ yaka Frontier Nagaland Territory (FNT), da pynyoo ki yeini i pyrchah deiwa pynbna da ka Public Emergency ha waroh ka Eastern Nagaland deiwa kyntu ya ki paidbah wym toh u thap Vote wei wow khang yei wan yalap Election.
Discussion about this post