Ym em wan kiwa mihkhmat JHADC cha ka yalang ka aiñ chong kurim ka KHADC

Shillong: Ka Consultative Committee wa da chna da ka KHADC wow bichaar bniah biang ya ka Khasi Social Custom of Lineage (Second Amendment) Bill, 2018, da rai wa i yumut yong ka Bill u man bait i kamjooh kamwa da mynjur da ka dorbar KHADC.

Hawa yaklam wa ki laad pathai khubor, u Chairman ka committee u Manstudy Nongrem da pyntip u waka Committee da rai ko leh wow kynthup lang ya u Secretary warim ka Council, u Wan Kharkrang uwa embynta hei wow chna ya ka Bill ha u snem 1997 khnang wa ka Committee leh u yoh ko yei pynche.

“Ka Committee u pyrchang ko wow pyndep ya ka bichaar hajrong kani ka Bill wei daw phah cha ka Executive Committee, kamjooh daw paan leh ya ka yumut na ki paidbah khnang wow yoh yaphyllu noh ha ka dorbar wow wan,” da ong u Nongrem.

Ha ka Consultative Committee da booh dkhot leh ya kiwa mihkhmat ka JHADC wow e yumut lang ki, tangwa ha ki ar tylli ki yalang waka Committee da chong ym em wa wan mih na JHADC.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa jubab wa ka JHADC ym kwah ko wow chna ya kam kani ka jooh ka Bill ka KHADC heiwa da kular u CEM ka JHADC ha ka seiñ CSWO wa ki kattu katni ki manbei na ri-loom Jaiñtia ha Jowai dang ha kini ki sngi, neiliang u Nongrem da ong u, “Nga ym em tip O yeini neibhah hawa yachem wa u CEM ka JHADC da ong u wa daw rah chwa ya kani ha ka Executive Committee. Ye u man wa ym pu em khut ya ka EC wei ye leh wa dadep pynman ya ka yachem waka EC yong oo tangwa ym em phah bru u naka JHADC cha ka yalang ka Committee.”

Neiliang u Erwin Sutnga uwa man kam u Legal Adviser da ong u wa i thmu yong ka Committee toh wow pyrchang wow wanrah ya ka Bill kawa biang wow yada ya ka jaitbru wei hadooh ka Supreme Court leh da ong ko wa ymye u pynemkaam bakla yei man hok ki ST/SC.

Hawa yatoh won wa chah pynbaad wa ka Bill ktah ko ya i hok manbru longbru, neiliang u Sutnga da ong u wa em ki ki hok wei toh u bood leh katkam ka rukom im næ i rukom man ka imlang sahlang.

“Ka hok wa ki aiñ em ki, tangwa i yada næ ki kaamram leh em ki wei kam ka jaitbru hap i wow pyndep, ki Hindu, Muslim Khristan ki em ki jar jiar ki kaamram wa ki haap ki wow leh katkam ka rukom im yong ki wei katkam ka jaitbru i leh em i ka kaamram ha ka imlang sahlang,” ong u Sutnga.