Ka KHNAM State Youth Wing da ong ko wa i chna yaka Shopping Mall ha Barik da mih khubor bha ko ha kini ki sngi katwa kiwi ki kaam kam i sahkut ka tulop kiwa sikai, i dooh kaam ki khynroo khyllood, i duna wei tlot i krehkaam ki PHC/CHC, i jæd i pra ki skur sorkar, i sahdien ki chnong nongkyndong toh iwa da chah myllin. Da ong leh wa ka Iewduh ym em yoh ko yei pynbha pynmiat lait na i lai pait u Lat ka jylla, u Montri Rangbah ka jylla, u Chief Executive Member ka KHADC wa u Syiem ka Hima Mylliem.
Ka KHNAM da ong ko wow chna ya kani ka Shopping Mall toh hei pynlut poisa iwa ym toh de iwa ke, iwa ym emkaam wow leh ha kam kini ki por wa duna poisa neibhah wa da tikna kiwa daw yoh myntoi toh du ki Contractor, ki Supplier wa kiwi kiwi kiwa yajan wa kiwa mihkhmat paidbah hapoh ka sorkar.
Chooh chooh da ong wa u Montri ki kaam pynroi sor da dep ong u wa ym lai chakhmat lada ym yoh yei mynjur naki paidbah. Wei yei ini da che wa ki paidbah kamjooh ki Party wa em hapoh ka sorkar leh da pynsñiaw ki yei pyrchah ya kani ka kaam. Kamtæ da yooluti wa ka sorkar daw pyndooh noh ko yeini i thmu deiwa pyrkhat yei sñiaw ki paidbah khamtam yei pynsñiaw ki lok wa em hapoh ka sorkar.
Da pynkynmoo leh yaka sorkar wa ki khynroo khyllood ka jylla ki pisa lynga mynsien ki neidaw wa ka mynried toh kawa ym yoo tikna kamtæ yei thmu wow chna ya kani ka Shopping Mall toh u pyndam chwa ka wei wow pynlut poisa wei por hei wow pyntikna wa ki khynroo khyllood ka jylla heh wei san ki deiwa biang.
Ka kyrwoh na u Thomas Passah, President KHNAM State Youth Wing.
