U Montri ka chnat Social Welfare, u Paul Lyngdoh hadien wa chah thoh khubor wa yada u ya u Montri warim ka chnat, u Kyrmen Shylla heiyatoh wa i pynemkaam bakla ya u khoo rachon ka jylla heiwa da chah pynbaad wa 1 lak churia uni u khoo da chem napoh kawi ka kudam yong ka M/s Continental Milkose wa em ha Boko, Assam.
Da e jubab u deiwa ong wa da dep puræ bniah u ya ka Report ka takit yong ka Inquiry Commission wa yahkhmat da u (Rtd) Justice Mool Chand Garg kawa da pynlut 10 bnai wow thooh bniah ya kani ka kaam heiyatoh wa uni u khoo wa da chah pynbaad toh uwa napoh ka Scheme ICDS tangwa ym em chem iwon iwon i leh bakla.
Kani ka Commission da ong ko wa hadien wa da dep yoh ya ki kot ki sla na ka M/s Continental Milkose da chem wym em pynemkaam bakla ya u khoo deiwa wanrah tooh cha kani ka Company napoh ka FCI wei u khoo wa dai da kani ka Company toh uwa da thied ki na ki yaaw ki haat.
Heiytoh won wa u khoo Fortified Rice lada toh uwa biang namo ym em i rukom pynkhreh ya oo, ka Commission ha ka Report yong ka da pyntip ko wa da dep chim nongmuna ko nadooh u khoo wa pynmih da ka Continental Milkose kamjooh kiwi na kiwa boon ki bynta ka Meghalaya wei da phah Test ha ka NABL Laboratory wei da nujor wa ki Test wa da leh da ka sorkar Meghalaya hi wei da chem wa man u uwa biang hi katkam ka aiñ NFSA.
Chooh chooh kiwi ki bru kiwa da wan chakhmat wow ujor pyrchah ya kani ka kaam leh ym em bien ki wow booddien wei wow pteiñ ya ka ujor hadien wa da dep kular ha ka Commission wow leh ki yeiwa emkaam kam kiwa ujor wow wanrahlang ya ki sabut.
Kamtæ ka Commission khlem da yoh ya kiwi de ki sabut wa biang da chem ko wa kini ki pynbaad toh kiwa khlem yurim.
Hajrong ini, u Paul da ong u wa chwa wow pynbaad wa yada u ya u para UDP, toh u puræ bniah ki ya kani ka Report neibhah ya kani ka Report leh dadep pait bniah da ka Law Department, u Advocate General wei ki leh da chem ki wa i chah pynbaad toh i wym ye wow yieñ i wym em kjat, kamtæ oo kam u Montri sorkar da rai u wow khang pynkut noh ya kani ka kaam.
Chooh chooh da ong u wa kawa thoh khubor toh u paan maap ko yeini i pynbaad kulmar ym du ya oo kam u Montri kamjooh ya ka Party wei ym em burom ko ya kani ka Commission wot hadooh ya u (Rtd) Justice Mool Chand Garg yeiwa chem u hawa pynlut por da boon boon bnai deiwa pynrap wa kani ka Report ka Commission toh kawa da yoh hadien wa wan kani ka sorkar thymme, kamtæ kammon u ong wa yada ya u Montri warim.
