U Montri wa thymme ka sorkar MDA u Sanbor Shullai da pynche u yei mih khubor wa yaroh u yeiwa ong u MP ka Mizoram wow pynyap ya waroh deiwa ong wa ini i mih khubor toh iwa bakla.
Da ong u wa hawa yaklam u wa ki laad pathai khubor da klam che u wa ym em ngait, wei ym em pynchlur u leh ya kiwon kiwon ki kaam wa pynjoo umsnam wei kwah u wow pynbait noh ya u pood heitæ i rukom wa ye u pdiang wei deiwa ya hunlang hapyrdi ka Meghalaya-Assam. Wei da klam u ya ini hajrong i ya kajia pood ha Ri-Bhoi wei ym em yatoh wa iwa jia hapyrdi ka Assam waka Meghalaya.
Da kdaw u leh ya ki 12 tylli ki thaw wa em ya kajia hapyrdi ka Meghalaya waka Assam kiwa emkaam wow pynbait smat yow yada ya ki jaitbru ri-loom ka Meghalaya kiwa da im bait hei tieñ.
Kamtæ da sñiaw u wa yow ye u yada ya ki spah tylli ki manyung wa im ha khappood da emkaam wow booh ya ki bor wa ye u yada ya i thaw yong i. Deiwa pynrap wa ini toh iwa em hapoh i bor wa i kaamram ka jylla wow yada ya ki bru yong ka.
Heiyatoh waka Assam-Mizoram, u Sanbor da ong u wa ym em hok u wow ong lane wow yachah cheiwon cheiwon. Deiwa ong wa i iwon iwon i jia wa pynmynsoo ym poi i cheiwon cheiwon wei ym ye i leh wow pynbait ya iyi iyi deiwa kyrmen u wa kiwon kiwon ki kaam wa yatoh wa u pood daw ye u pynbait khlem da pynjoo chi joo leh i snem.
Da ong u leh wa chaniah u yei yahkhmat u Amit Shah, u Himanta Biswa Sarma wa u Conrad Sangma wow pynbait ya u pood yow wanrah yei imsuk chongsuk hapyrdi ki bru ka Assam waka Meghlaya.
Da ban joor u wa ka BJP toh ka wow pynyatylli ya ki bru wei wow yada yei jar jiar i man kyrpang ki bru kiwa em ha thaaiñ Northeast heiwa ka BJP da yaleh ko wow pynbait ya ki kaam wym jooh em leh da kiwi ki sorkar. Heiwa ka BJP da kheiñ wei booh ko ya ka thaaiñ Northeast ha ka jooh ka kyrdan wa kiwi ki bynta ka India wei kwah ko leh wow pynku pynroi ya ka deiliang waka ri waroh kawi deiwa pynneh pynsah ya ka dustur riti wa mahajon kamjooh ya ka rymaw.
Puræ leh: Yaroh u Sanbor yei chlur ki nong Mizoram
