U Executive Engineer warim ka PWD (Building), u Ransom Sutnga da pynche u hajrong i chah pynbaad u heiyatoh wa i chem lyngba ka RTI wa da pynmih paidbah da kawi ka seiñbhalang hajrong i pynku dor ya ka Tender wow chna ya ka Yung Dorbar Chna Aiñ wa thymme, heiwa da ong u wa ka RTI toh kawa emkaam, toh ka hok wow yoh yutip tangwa ymtoh wow pynsñiawthooh bakla, neibhah lada ymtip wow batai daw yah i cheiwa bakla.
Da ong u wa katkam ka kyrdan yong u Executive Engineer, ym ye wow pynkylla ya i kyntien ka Contract neibhah u Executive Engineer da yoh bor u du wow pait ya ki kaam wa lut hapoh T. 6 lak.
U Ransom da ong u yeini hawa pynche hajrong ka RTI wa da yoh da ka HYC, kawa da ktah ya oo neibhah toh u Engineer uwa dang chongngiah wot ha kani ka chnat wei chwa wow chong da pait u leh ya ki kaam wa yatoh wa i chna ya ka yung dorbar wa thymme ka jylla ha Mawdiangdiang.
Da ong u wa em chiboon ki kyndon wow pynthymme næ wow pynku ya i dor yong ka Tender, ya kawa ka yukheiñ da pynkhreh da ka yung krehkaam u EE wei da phah won cha ka yung krehkaam u Chief Engineer wow yoh yei mynjur wei hadien u CE u phah u cha ka chnat wa toh u pait, ka Parliamentary Affairs, hadien won u wanrah ha ka Departmental Sanctioning Committee. Hadien ini ka Parliamentary Affairs manda dep mynjur daw phah won ko cha ka Planning Department neitæ won cha ka Finance Department ka wow phah wow leh yeiwa emkaam.
Heiyatoh wa i dawa wow em da ka takit, u Ransom da ong u wa nadooh wa haap i tnoom kyllung dadep pynsñiaw wow em ka takit hajrong ini i jia. Heiyatoh wa i kreh ya ka Inter State Bus Terminus, da ong u wa kani ka yung ymtoh kawa pait da ka chnat PWD (Building).
U EE warim da ong u wa i pynbaad pyrchah ya oo ye i wow yah cheiwa bakla deiwa pynsñiaw wa neini chaphrang ymtoh de wow mih kamni, lym kamtæ dei wym yohsa daw lai u da ka luti ka aiñ.
Hawa kylli yei daw wa hap u pynche dei yong oo samen hajrong kiwa boon ki chah pynbaad hawa haap ka tnoom, u Ransom Sutnga uwa da thmu leh wow mih madan ha ka Election MLA kawa daw man ha u snem wow wan na North Shillong, da ong wa neidaw wa daw yakhun u ya ka Election, kiwa kyrchaan da kyntu ki ya oo wow pynche pyrchah ya kitai ki chah pynbaad khnang wa kiwa kyrchaan waroh u sñiawthooh ki hawa yatoh wa katai ka bynta.
