Ka seiñ bei ka Hynniewtrep National Youth Front (HNYF) da pynsñiaw ko yei sñiaw sarom hajrong i chah kem u Bless Dkhar uwa chah pynbaad wa khrong poisa pyrchah ya ka aiñ ya ki Truck kiwa lai lyngba ka yingkieñ Dam ha Umiam.
U Sanbor Rapsang uwa man u Discipline Secretary ka HNYF seiñ bei da ong u wa ka seiñ kwah ko wow pynche paidbah yei leh u Bless wa ini i kaam ym em yatoh ko iyi iyi waka seiñ HNYF, wei neiliang ka seiñ da maham ko deiwa khor ya kiwi ki dkhot wa ymtoh u leh ki ya iwon iwon i kaam khlem da tip ka seiñ.
Da ong u wa neiliang ka seiñ daw chong pyrkhat ko iyi wow leh pyrchah ya u Bless Dkhar, tangwa da ong u wa ya katni wa da chem kem u ha ki pulit, ym man de u kam u President ka HNYF, neibhah kani toh ka kaam wa da leh da oo hi samen wei ka seiñ ym embynta ko iyi iyi hajrong ini i kaam.
Kam wow pynkynmoo wa kawi na ki laad pathai khubor ka jylla ha kini ki kajiak sngi da dep ko wow thaad madan ya ki kaam pyrchah aiñ wa da leh da u Bless heiwa da pynlait paidbah yei klam Phone yong oo wa uwi na kiwa khayi heiwa da sñiaw yei dawa poisa hadooh Rs. 1500 kawi ka Truck wow pynlait u lai naka yingkieñ Dam.
Hadien wa mih ka khubor ha ki rynsan Social Media, neiliang ki pulit ynnin i miet heipor kamwa 9:00 waje da lai kem noh ki ya u Bless na Pohkseh, wei da Register hi ki da ka Suo Moto Case pyrchah ya oo wei da pynngat leh ha ki kyndon khrong poisa pyrchah ya ka aiñ wei i tyngkheiñ yaka hukum yong ka yung bichaar ka Meghalaya High Court.
Neiliang ki pulit da rah ki ya u Bless ynne ka sngi cha yung bichaar wei katkam ka khubor wa da yoh da khana wa ka Kachari da phah ko ya ki pulit wow kset ya u 3 sngi neibynta wow takit.
Puræ leh: Chah kem u heh ka HNYF wa dawa poisa na ki Truck wa lai naka yingkieñ Umiam
Discussion about this post