Shillong: U Superintendent of Police ka East Khasi Hills, u Sylvester Nongtnger da pyntip u wa ki pulit ym emkaam ki wow kem ya kiwa lai cha ka khawai bia ha Greenwood Resort kawa em ha Khanapara, Assam wei i daw toh wa kini ki bru hadooh kattæ ya krehlang ki wa ki pulit hawa pynman ya ka takit. Da ong u leh wa hadooh kattæ ka takit ya kini ki bru dang lai ko.
Katkam wa pyntip u SP, ki pulit da pynman ki yaka takit ya ki 35 ngut kiwa lai cha ka khawai bia, wei napyrdi kiwa lai da em ki 2 ngut ki khonboo kiwa ym ye wow katwa uwi won toh uwa yah kari uwa ym pu em u yoh u takit neibhah wa em u cha Assam.
Kam wow pynkynmoo wa da em 39 ngut du na East Khasi Hills kiwa lai cha ka khawai bia ha Khanapara haka 27 tarik u Naiynru wei neiliang ka Deputy Commissioner da ujor ko ya kitai ki bru hadien wa phah ka sorkar neidaw wa tyngkheiñ ki ya ki kyndon wow yada na i poor ka khlam COVID- 19.
