15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Pynche ka EC ka JHADC yei pynbaad ka BJP wa pynemkaam bakla yaka poisa ka sorkar pyrdi

Advertisement ad1
Advertisement ad1

Jowai: Ka Executive Committee yong ka JHADC wa yahkhmat da u Thombor Shiwat kam u CEM, ynne ka sngi deiwa emlang ki kattu katni ki dkhot ka Executive Committee wa kynthup ya u Dy. CEM u Lasky Rymbai, u Phasmon Dkhar, u Brightstar Chyrmang, u Eveningstar Teron, u W.G. Sungoh wa u Ruda Ioo Tang da pynche ki wa ym em iwon iwon i pynemkaam bakla yaka Scheme SAG ka sorkar pyrdi da ka Council kamwa da pynbaad da ka BJP lyngba u President u Ernest Mawrie wa u Lakhon Biam, MDC ka JHADC.

“Ini i pynbaad toh kawa ym em yurim neibhah wa ym em pynemkaam bakla næ pynlai bakla yaka poisa cha kiwi ki Scheme neibhah wa ya kani ka Scheme i da pynemkaam hok yaka deiwa e bait da ki Work Order katkam i dor wa da mang cha ki Contractor kamjooh cha ki Local Committee,” ong  u Thombor Shiwat.

Da ong u leh wa wa hadooh kattæ ym pu em leh uwi u Contractor wan wan ujor wa ym yoh Bill heiyatoh wa i pynkrehkaam ya katai ka Scheme yong u snem 2018-2019, chooh chooh hadooh katni, kani ka Scheme da lai bait wei da dep pynkreh kamwa 90%.

Heiyatoh waka poisa ka yong ka Council hi, u CEM da ong u wa ini wa dep, u Lakhon Biam da wanrah u leh hapoh ka yung dorbar ka Council deiwa ong wa ileh wa kiwa yoh myntoi ym em Bank Account ki mo heiwa toh u thap bait haka Account yong ki ya kiwon kiwon ki Grant næ ki Scheme; hajrong ini, u CEM u ong u wa kani toh ka Scheme wa da jooh e na ki por cha ki por, katwa u Lakhon da sñiawthooh bakla u deiwa ong toh kawa naka SAG.

Da pynche u wa kani toh ka poisa ka yong ka Council hi kawa ki jooh e yarap ki neibynta i emkaam ki paidbah lada em i chah tympra lane chah ktah ka rep ka riang, ki yung ki sem wa kiwi won kiwa man kiwa emkaam jhan.

“Hawa yatoh wa pynbaad wa da pynemkaam yaka poisa wow su tulop yaki wakreh, tangwa hei yong sakhiat hi ka Council ye ko wow chim kylliang yaka poisa chipor kam ka ram (Temporary Loan) wei hadien wa da yoh won yaka bhah naka sorkar jylla lyngba ki mar poh khyndaw (Major & Minor Minerals) daw pynuiñ biang yaka poisa,” ong u Phasmon Dkhar EM Incharge Civil Works Department.

Da ong u leh wa hadooh kamwa man kattæ, ym em uwi leh u Contractor næ ka Local Committee wa wan ujor wym yoh Bill hanla da pyndep yei kreh kamwa da pynbaad da u Lakhon Biam wa ki Contractor ym yoh Bill ki. Hajrong ini, da kyrpaad u leh wa lada em kam kini ki Contractor toh u wan ki wow yachem, neibhah wa neiliang yong oo, kawon kawon ka Bill wa wan ha ka miej da dep pynlait lut u.

“Chooh chooh i pynbaad wa ka Plan Estimate yong ka Council ym em lai ko katkam wa toh, tangwa i em i yaki Engineer wa pliah haki kyrdan waphær waphær neibynta wow pait bniah ya i lai bait ki kaam kreh yong ka Council wei na i por cha i por iwon iwon i phah naka sorkar jylla leh da leh i wei da yoo leh wa ka pdiang ko ya iwa leh i.”

“Heiyatoh won wa i pynbaad u President ka BJP wa ong wa i da thied i yaka Ambulance heiwa ka chnat Civil Works Department toh du neibynt u chna u tei, nga pynche wei kyntu O ya oo wow pait bniah yaka kyndon namo ka Guideline kammon kdaw ko, neibhah katkam ka Guideline da kdaw ko wa kam chibynta ka Civic Services, ini kynthup ko yaka Community Hall, um kor, Street Light, luti lai kjat wa kiwi kiwi hadooh wow thied yaki PA System wa Ambulance leh haap ko hapoh ka Civic Services,” da pynrap u Phasmon.

Da ong u wa hei yongsakhiat chwa wow pynbaad toh u pait wei bichaar bniah bha yaki Guidelines ym toh wow yah bakla khlem yurim ya ki paidbah wa ktah ko yei dur i dar yong ka Executive Committee.

Share this:
Previous

Ym emkaam wow kem ya kiwa lai khawai bia ha Khanapara, ong u SP

Next

Da phah khang chwa ya ka Star Cement waroh kawi: DHS