U Symbood Montri Rangbah ka jylla, u Prestone Tynsong da ong u wa i pynbait pood hapyrdi ka Meghalaya wa Assam iwa da lai chaphrang katni, ym emkaam hadooh wow pynkylla ya ka aiñ North Eastern Areas (Re-organisation) Act, 1971 tangwa emkaam du ya ka chnat Survey of India wow pynbiang liar ya ki dak neibynta wow phiah ya u pood.
Hawa kylli, u Prestone da ong u wa lada hap pynkylla ya ka aiñ hapoh ka Riti Synchaar namo wow yaklam pynkylla ya ka North Eastern Areas (Re-organisation) Act, hap wow lai lyngba ka Parliament, tangwa heiyatoh wa i pynbait pood ka Meghalaya wa Assam, ini toh du hapyrdi ki ar jylla wei hadien wa da chim ya ka rai wa khaddooh iwa emkaam toh du ya ka Survey of India wei yeini daw pynkrehkaam hadien wa da chim ya ka rai.
Heiyatoh wa i yachem ki ar ngut ki Montri Rangbah kawa man ynnin ka sngi, da ong u wa kani ka yalang toh hapyrdi ki ar jylla hadien wa da yoh ya ka bui na ki Chief Secretary wei ha ki kajiak sngi wow wan waroh ar ngut daw lai yachem noh ki ya u Montri ki kaam pohyung ka ri, u Amit Shah wei hadien ini daw pyntip da waroh ar ngut ki Montri Rangbah.
Hajrong i dawa ka Congress wow khut chwa ya ka yalang yong waroh ki seiñ saiñhima chwa wa ki ar jylla u pyntip ki cha ka sorkar pyrdi, u Prestone da ong u wa ka sorkar dadep khut ko ya ka yalang wei waroh da embynta ki wow syllok hajong wow pynbait ya u pood tangwa chong won ko leh ha ki Montri Rangbah lada dang sñiaw emkaam ki wow khut ya ka yalang.
Hawa kylli, da ong u wa ka jylla Meghalaya da pynsñiaw ko yei thrang wow pynbait noh chwa ya ki 6 tylli ki thaw chwa ka 21 tarik tangwa chong won ha ka rai lang ki ar ngut ki Montri Rangbah.
U Prestone ha iwi i liang da ong u wa daw man ko i jop wa khroo ya kani ka sorkar lada ye ko wow pynbait noh ya u pood, khamtam ha ini i por wa ka sorkar u lehkmen ko ya ka Golden Jubilee. Da ong u wa ympu jooh em kawon kawon ka sorkar kawa da ye wow lai chaphrang hadooh katni wei i burom lai i cha waroh ar ngut ki Montri Rangbah ki ar jylla.
