Ym hiar O na i kaam Waheh Chnong ka Ummulong: S. Langi

Jowai: U Shellsing Langi ha ka khubor wa phah u, da ong u wa ym hiar u na i kaam Waheh Chnong ka Ummulong.

Ki daw toh wa ka kaam chnong hi toh kawa kreh lang wa kiwa ksoh kaam ha ka chnong tangwa ya u Secretary Chnong u P. Lamare wa u Chairman u B. Pohshna ym em e laad ya ki wow klam ki ha khmat ka EC ka JHADC ha ka 07-11-17, ini pynyoo wa em iyi iyi ha lyndet.

U Langi da ong u wa u Dolloi, ka Administrative Officer wa ka EC ka JHADC da pdiang ki du ya i soi pyrtuid kiwa 139 ngut wa soi thok pyrchah ya u Waheh Chnong tangwa kyntait won ki ya ki 500 tam wa soi pyrtuid wa wanrah u wa kyrchaan ya oo.

“Ini man i bakla joor neiliang u Dolloi wa ka EC u Shullai heiwa katkam ka Section 31(2) ka aiñ ka JHADC da ong che ko wa emkaam chiteiñ kiwa chong chnong wa soi pyrtuid yow man ko kawa pyrchah yei bha i miat katwa u Dolloi wa ka EC ym em bichaar ki ya ini,” da ong u Langi.

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Chooh chooh da ong u wa ya ka aiñ ka JHADC da thoh hei ktien phareng wei da toh wow kylla noh ka cha ka ktien Khasi yow sñiawthooh ki MDC hadooh ki paidbah.

Da ong u leh wa ka Section 28(2) da ong ko wa iwon iwon i e yumut cha ka EC toh u lai ko lyngba i thoh cha ka dorbar chnong lada mih iwon iwon wa ym sñiawsuk yei wa krehkaam u Waheh Chnong, wei da man ko i pyrchah ya ka aiñ heiwa du ki chispah tam kiwa soi pyrtuid pyrchah ya u Waheh Chnong da chong nia ko palat ya ki 500-600 ngut kiwa soi pyrtuid wa kyrchaan ya u Waheh Chnong.

Da pynsuba ko leh ya oo wa i leh sop sop u Dolloi wa ka AO wow thung Acting Waheh Chnong iwa ye u man wa da chah pynbaam tyngka ki næ yoobeiñ ki ya ka chnong wei ka JHADC haap kitkhlieh ko lada jia iwon iwon ha ka chnong Ummulong.

“U Dolloi toh u thooh bniah u na ki dkhot ka chnong wa hun namo ym em hun ki wow tyrwa thung Acting Waheh Chnong,” da ong u Langi.

Da pynkut u deiwa ong wa ya oo da jied da ki paidbah wei i por u kam u Waheh Chnong u kut ko ha ka 07-02-2018 wei ym hiar u kam u Waheh Chnong i kaam kreh mon sñiawbha u wei daw lai u leh cha ki bor ka aiñ wow yoh yei hok wei yow man ko leh ka nongmuna ya kiwi.