Hadien 5 sngi wa ka Khasi Students’ Union da ujor pyrchah ko ya kawi ka seiñ wa tip kam ka Legal Rights Observatory (LRO), kawa da pynmih ya i pynbaad wow pynyasih jaitbru na i kulmar wa da mih ha Mahadev Khola, Laimer Lawsohtun.
Ynne ka sngi neiliang ki pulit da khut ki wow chim ya ka ujor na u Legal Affairs Secretary ka KSU, u James Mawphniang ha Lumdienjri Police Station.
Ha ini i khut ki pulit da chim yutip ki heiyatoh wa ka ujor FIR wei da lai lang leh kiwi ki heh ka seiñ wa kynthup ya u Vice President u Biangbor Paliar.
Neiliang ki heh ka seiñ da klam che ki wa chaniah ki ha ka takit wei i krehkaam ki pulit wow kem ya kani ka seiñ kawa da thoh ya ki kyntien wa pynchit wei pynyaphær jaitbru wa ka niam ha ki Social Media. Kini ki heh ka seiñ da sñiaw phylla ki leh wa lada ya kiwi kiwa pynmih ya ki kyntien pynbaad ki wym yahaap aiñ ha Social Media smat ki wow chah kem wei chah hajir, deiwa kylli neiyi i daw wa chim por ya ki pulit wow kem ya ki bru wa pynlai ya ka LRO.
Katkam i batai ki dkhot ka KSU, neiliang ki pulit da ong ki wa ki bru kiwa pynlai ya kani ka Account ka LRO toh kiwa na baar ka jylla, tangwa neilang ka seiñ sñiaw ko wa emlang leh kiwa na kani ka jylla ya kiwa ki pulit toh wow leh yeiwa emkaam kamtæ ka seiñ daw hap chim ko da kiwi ki rai.
Puræ leh: Maham u Conrad ya kiwa pynmih khubor wa yaphær niam wa jaitbru
Discussion about this post