Ym jooh lai phah sumaar ha u Doctor thok, ya kiwa mihkhmat leh ym toh u jied da kiwa thok: Movement For Change

Ha ka 18 tarik kiwa yahkhmat ki seiñ wapher wapher lyngba ka Movement For Change wa da yahkhmat da u Convener u P. Samayang wa u C. Sungoh da pynman ki yei pynsñiawthooh paidbah ha Iawmusiang, Jowai hajrong kammon u jied ya kiwa mihkhmat cha ka yung dorbar chna aiñ ka jylla ha kani ka kynti khnang yow ye u wanrah i kylla hei synchaar khadar.

Kiwa klam ha kani ka sngi kynthup ya u Rastingwell Thabah, u Thomas Passah, u Chandame Sungoh, u Pailakordor Lyngkot, u Firmly Ryngkhlem kiwa da ong wa kam ki paidbah toh u man kiwa stat u jied ya kiwa mihkhmat wym toh u chah pynbiej ha ka poisa lane iwon iwon i pynbiej, neibhah wa ka jaitbru da emkaam bha ko ya kitæ kiwa yahkhmat wa stat wow e yada ya ka ri ka jaitbru wei kamjooh leh u pynyoh myntoi ya u paidbah.

Da e nongmuna haroh ki yei eh i khoo wa ki paidbah tyngkhooh ki ha ki snem wa da lai wei da kdaw ki leh ya ki kaam wa da leh ka sorkar kiwa man pyrchah ya u paidbah.

U Thomas Passah da ong u wa hawa kjut chitom daw lai cha u Doctor wa paka uwa da pyndep yei puræ puthi wei ym em wow lai cha u Doctor wa thok wa kam toh u Doctor khlem lai puræ, kamtæ da ong u wa hawa jied ya kiwa mihkhmat leh man kamjooh hi wei toh u jied ya uwa mihkhmat wa ye u sumaar sukhær ya ka jylla wei ym toh u chah yah bakla ha ka poisa hanla boon na kiwa em ha Meghalaya toh kiwa dooh wei wa boon kiwa dooh toh neidaw kiwa heh spah pyndooh chynnam ki yow suk u thied.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Neiliang u C. Sungoh da ong u wa toh u jied ya kiwa da biang i stat i tip hanla ym em khang ya uwon uwon wow yaleh Election deiwa booh kyndon ya ka puræ puthi. Da ong u wa lada ym biang i stat daw man ko iwa eh wow synchaar neibhah ka ktien u Blai leh ong ko wa lada kiwa yahkhmat man ki kiwa stat, ka jaitbru leh ku ko.

U Pailakordor Lyngkot won da ong u wa hawa jied ya kiwa mihkhmat toh u yoh da kiwa bien u lai lang wa i chirup hawa kmen wa sñiawsih neibhah ka ri yong i da em ko ha riat ha kyndian wei lada ym khyrngiat thiah i, i kam ki bru wa khian paaid ye i wow wiar na kani ka sla pyrthai.

Da ong u leh wa ham e laad ya ka poisa wow tympra ko ya ka yung ka sem, ka imlang sahlang wei wow pyrkhat 10 sien 20 sien chwa wow thap Vote neibhah lada bakla wow jied daw maad yei jynjar ha kini ki san snem wow wan.