U MDC wa dei thung namo u Nominated MDC ka seiñ UDP, u Bindo M Lanong da khana u wa da em u yei thmu wow yakhun yaka Election MP na ka seiñ UDP na Shillong Constituency, wei yeini da pyntip leh da ka chithi nadooh u April uni u snem cha kiwa yahkhmat ka UDP, tangwa ym em yoh u yei jubab.
Ha kani ka chithi, neiliang u Bindo da thoh che u leh deiwa ong wow ya mylliñ noh ya iyi wa da dep wei wym toh u ksoh nood ya kiwa yahkhmat ki wym e Ticket ya oo, wei ka UDP leh ymtoh u ksoh nood ko ya u Bindo neibhah da yieñ u wow yakhun Election MLA na Nongkrem kam u kyrtong samen.
Ya kani ka chithi kawa man leh hei dur yong ka Application, u Bindo da pyntip u wa da e cha u President wa General Secretary. Tangwa u Bindo da sah u hei lyngngoh biang heini leh wa yaka chithi ym em wa jubab ka da kiwa yahkhmat ka UDP.
Hadien ini, u Bindo da ong u wa da phah biang yei pynkynmoo ha u bnai June wei heini leh ym em yoh u yei jubab, wei u Bindo da thoh biang u sa kawi ka chithi ha u August, heiwa ha kani ka chithi da klam noh u deiwa che kdar ya kiwa yahkhmat ka UDP wow sñiawbha ki u chim wym toh u kheiñ ya kitu ki chithi wa da phah u nachwa wei wow chim noh ya ka chithi wa thymme kam ka rai wa da kynran dien noh u ya idæ wow paan Ticket neibynta wow yakhun Election MP.
Discussion about this post