U Montri ka chnat puræ puthi ka jylla, u Lahkmen Rymbui da pynsñiaw u wa daw em i chah ktah ki khynnah puræ ka jylla nei wanrah ka sorkar India da ka Central Entrance Test wow puræ ha ki kyrdan Undergraduate wa Postgraduate ha ki skurbah, neibhah wa ya ki Exam daw pyn yakhun bait katkam ka NCERT, wei daw chem chitom ki khynnah palatsor ki wym yoh yeiwa emkaam wa biang.
Da ong u wa ha ka jylla Meghalaya ka skurbah North Eastern Hills University (NEHU) wa neiliang ka sorkar jylla daw pait ko ha iwon i rukom u leh khnang wow lait ki khynnah u chah ktah hawa yaleh ki wow psiah ha ki College. Da ong u wa ka sorkar daw bichaar bniah bha ko iyi wow leh ko neibynta i miat i bha ki khynnah ka jylla.
Ka University Grants Commission (UGC) ha ka 21 tarik uni u bnai da pynbna ko wa ym em de i kheiñ ya ki Marks Class XII wow lai puræ ha ki kyrdan Undergraduates wa Postgraduates yong u snem 2022-23 ha ki Central University wa ki College wa da haap hapoh ki skurbah ka ri. Tangwa i pynpsiah Class u man bait i katkam ka Common University Entrance Test (CUET).
U Lahkmen da ong u wa i thmu yong ka Sorkar India wow pynman bait da ka Entrance Test neibynta wow yoh puræ ha ki College toh iwa bha, tangwa em i sñiaw leh neibhah ya ki Exam daw pynyakhun bait katkam ka NCERT, iwa mut wa ki lynnong wa e da ka jylla daw em i chah ktah ki khynnah hawa yakhun ya kani ka Test.
