Jowai : Ki le sngi wa yakhih ki wa sikai skur Deficit wa Ad-hoc da poi ko ynne ka 29 tarik ka sngi cha wa kut deiwa wan lang ki dkhot ka Meghalaya Upper Primary School Teachers Association (MUPSTA) West Jaiñtia District ha ka “Sit in Dharna” kawa da pynman ha thaw pynyieñ bus ka MTC ha Iawmusiang, Jowai.
Ha kini ki le sngi kiwa sikai waroh ki skur wa hap hapoh ki kyrdan Deficit wa Ad-hoc hapoh ka lama ka Joint Action Committee of the All Teachers’ Associations of Meghalaya (JACATAM) West Jaiñtia Zone da dam ki u hikai wei wa ki dkhot ka MUPSTA West Jaiñtia District won da lai skur ki tangwa ym em chim class ki.
Ki dawa kini kiwa sikai toh yow chimkti noh ka sorkar (Provincialise) yei kaam yong ki yow yoh lut ki waroh ki myntoi wa yoh kiwa sikai ha ki skur sorkar neibhah kiwa sikai kiwa yakhih, da su tulop ya ki da ka sorkar tangwa ym em won da tipmit pura ya ki kam kiwa kreh sorkar.
Deiwa Provincialise yei kreh yong ki daw yoh ki boon ki myntoi kam ka Pension, i yarap poisa heipor wa kjut wei heijooh i por leh yow man solansar i rukom su tulop cha waroh kiwa sikai yow pynbiang kawi donhi ka service book ya waroh.
Kamwa man katni kiwa sikai hapoh ka jylla da yabhah ya ki ha kiwa boon tylli ki bynta kiwa da poi hadooh 7 tylli. Da yooluti wa lada chimtki noh ka sorkar daw em noh du le tylli ki bynta ya kiwa sikai ki wow tip kam kiwa sikai ha ki skur Sorkar, Government Aided namo ki Provincialised School wa ki Self Financing namo ki Private School.
Iwa ktah joor dooh ya kiwa sikai toh khamtam ka poisa poilaiñ heiwa ym jooh yoh tista ki ya ka tulop wei lada kwah ki u chim ram na ki bank yow chna yung boon wa chah kyntait neibhah ya ki, ki bank leh ym em chaniah ki u e ram ya ki neidaw wa ym em man ki kiwa da em pura hapoh i pyllai ka sorkar.
Neiliang kiwa sikai Ad-hoc da ong ki wa kwah ki ka wi donhi ka tulop wa man salonsar hapoh ka jylla wei da kyrchaan pura ki ya ka JACATAM.
Da ong kini ki seiñ wa lada ka sorkar ym ap ko yei dawa yong ki daw pynjoor chooh ki i yakhih yong ki.
Discussion about this post