U Winning G Sungoh, MDC ka UDP hapoh ka JHADC, hawa klam haka yalang pynskhem yaki Unit wapher wapher ka UDP Jowai Circle ynne ka sngi ha Dulong Jowai, da ong u wa i kyrmen wow pynim biang yaka jylla chong ko haka Party UDP, neibhah kam ki paaid chong chnong wa khian paaid wa em yei man wa kyrpang wa rap phær nadooh ka rukom pyrkhat, ka rukom synchaar chnong synchaar Elaka ter ter wym ye u lait neini.
Ong u wa dang ini wa dep heiyatoh wa u pood u ang da yoo wa da em i yaam kjutnood ki bru cha ka thaaiñ Ri-Bhoi heiyatoh wa i rukom pynbait pood, wei mih leh i kylli wei leh ka sorkar mylliñ ko yaka District Council wa kiwa yahkhmat yong ki Syiem, ki Hima.
“Kam uwi u dkhot wa em hapoh ka Council da jooh yaklam O wa ki lok hapoh ka JHADC wa la jia poi ka pali u pynbait yow pood hapoh Block-I, ym kwah i wow jia kamwa man ha KHADC, neibhah wa hapoh ka Council em i yaka Land Law namo ka aiñ neibynta ka khyndaw ka chyiap ka wym pu em hadooh katni ha KHADC.”
Ong haroh u wa lada puræ haka History ka JHADC ye u chem wa ha u snem 1968 da wanrah yaka Amendment namo wow pynkylla heiyatoh wei mantre ka JHADC yaki khyndaw ki chyiap katwa ha KHADC won dang pait daki Syiem waki Hima.
Kamtæ lada poi u pood wow pynbait haka thaiñ Block-I kyntu u waka sorkar wymtoh u mylliñ ko ya kiwa yahkhmat ka JHADC, ki Dolloi neibhah wa em hei syir mynsien.
Heijooh i por ong u wa emkaam u khyrngiat yong bru deiwa e laad noh u shynchaar daka Party tre ri yei yong idæ hi wym toh u shynchaar da ki Party wa na baar.
