Shillong: Ka Khasi Student Union Ranikor Circle da maham ko wow yakhih pyrchah ko ryngkat wa ki Dorbar Shnong ka thaiñ lada ka sorkar ym e ko ya ka Civil Sub Division heithaw ka Administrative Unit.
Hawa yaklam wa kiwa pathai khubor ynnin ka sngi, u President ka KSU Ranikor, u Marconi Thongni da ong u, “Ym kwah i yei switmit tangwa kwah i yei ja yow kdang”.
Da ong u wa ka thaiñ kyntait ko yei e ka sorkar ya ka Administrative Unit ha Ranikor kawa da booh u wai ha ka 10 tarik uni u bnai wow wai da u Dr. Mukul Sangma.
U Thongni da ong u wa i e ka sorkar da ka Administrative Unit man i kam i wow pynbiej switmit wei wow pynbiej ya ki paidbah ka Ranikor wa da jan ka Election.
Da kam leh wa ka KSU chirup wa ki seiñ manbei wa ki Rangbah Shnong yong ka thaiñ da rai ki wow pyrchah yei wan wai ya ka kani ka Administrative Unit heiwa da dawa won wow e da ka Civil Sub-division.
Ki paidbah da dawa ki leh wow booh sa kawi ka Block, ka Wahkaji-Umdohlon ka wow phiah na ka Ranikor Block khnang wow wanrah yei roi i paar wa smat ha ki thaiñ wa sahdien.
Da kam leh wa ka Ranikor Civil Sub-division toh kawa da slem wei hawa wyrchaw yeijooh i leh ka sorkar da e pathan ko da ka Pynursla wei da pynmih ya ka Block Mawlai wa Mawpat khlem da em iwon iwon i bichaar iwa biang.
“I e ya ka Pynursla Civil Sub-Division wei ha Mawlai wa Mawpat Block pynyo wa leh chilliang khmat ka sorkar ya ki thaiñ nongkyndong neibhah ka Mawlai wa ka Mawpat Block, ki em ki ha khmut ka sor Shillong katwa ka Ranikor jngai ko 150 km wei man ko ka thaw wa dang sahdien bha”, da ong u Thongni.
D ong u leh wa ka KSU wa kiwa yahkhmat ka chnong deilang wa ki manbei ki da dawa ki wow e noh ya ka Ranikor Civil Sub-Division wa ka Block Wahkaji-Umdohlun.
Katkam ka Census 2011, hapoh ka Ranikor Block da em hadooh 157 tylli ki chnong wa 41,000 ngut ki kiwa chong chnong wei i heh ko da poi i cha ka 760 Sq Km.
Discussion about this post