U Montri Rangbah ka jylla, u Conrad K Sangma da khana u wa ka sorkar da phah ko wow pynsangeh ya waroh i thmu wow booh ya ki thaw yakhle namo ki Casino hapoh ka jylla, heiwa da ong wa ym em chukor ya ki paidbah, neibhah hadien wa da dep wow ya syllok wa ki seiñbhalang wa kamjooh ki kynhun niam, ka sorkar da sangeh ko wow lai chakhmat ha wow chna ya ki Casino.
Kam wow pynkynmoo wa u Montri wa pait ya ka chnat lum dan (Taxation), u James PK Sangma da pyntip u hapoh ka dorbar ha kani ka tayaw wa da dep e 3 tylli ki License wa chipor wow pynlai ya ki Casino ha Ri-Bhoi. Hadien ini wa pyntip u James, neiliang ka Joint Action Committee Against Casino na Ri-Bhoi da pynsñiaw ko yei chrai ya ka sorkar neibhah ha i yachem wa ka JAC da pyntip wa da pynsangeh ya itai i thmu. Kamtæ neiliang kiwa yahkhmat niam hapoh ka Khasi Jaintia Church Leaders Forum (KJCLF) leh da beiñ joor ki ya ini i leh ka sorkar neibhah ka sorkar da thok da chukor ko ya ki paidbah deiwa lai chakhmat wow chna ya ki Casino.
Hawa kylli ynne ka sngi, u Montri Rangbah da ong u wa kamwa man katni da em kitu kiwa da dep chna hachwa wow yachem wa ki seiñbhalang wa ki seiñ niam, tangwa hadien wa yachem wa ya syllok da pynsangeh syndon ya waroh i thmu wow booh ya ki thaw yakhle.
Hawa yatoh wa i e ya 3 tylli ki License, u Conrad da ong u wa kitai ki License toh kiwa chipor wei daw kut noh ki hadien 6 bnai.
Ha iwi i liang u Montri Rangbah da ong u wa neini chakhmat hachwa wow chim ya kiwon kiwon ki rai hawa yatoh wa i booh ya ki thaw yakhle, ka sorkar daw yasyllok bait chwa wa ki seiñbhalang kiwa yahkhmat niam wa ki paidbah.
Puræ leh: La le tylli ki License wa chipor da e ka sorkar yow booh ya ki thaw yakhle
