Shillong: U Symbood Montri Rangbah ka jylla, u Prestone Tynsong da ong wa ka aiñ daw leh ko yaki kamram pyrchah yaki bru kiwa thmu wow wanrah yei kulmar haka jylla kawa ktah yaka suk ka saiñ. Da ong u waka sorkar ym ye ko wow pait wei wow ap ya kiwa leh næ pynkulmar yong ki bru wa khlem kaam khlem jaam wei daw leh da iwa eh wei ym maap yaki Gunda.
Hajrong i chah thombor u Engineer wa kreh ha NHIDCL ha South West Khasi Hills, wei kamjooh i chah kawang Petrol Bomb ka yung krehkaam yong ka National Highways and Infrastructure Development Corporation Limited (NHIDCL), u Prestone da ong u wa ka sorkar da phah ko yaki pulit wow thooh yaki damok kiwa emkti.
Da ong u wa ki khynroo ka jylla ym toh u sñiawthooh bakla ki neibhah wa ki Company kiwa wan wow kreh haka jylla toh neidaw waka sorkar jylla ka emkaam ko wow pynkreh yaki kaam pynroi waphær waphær, wei lada kini ki Company lai liwan ki, iyi wow jia yaki kaam wa da ki spah klur kiwa da thmu wow pynkrehkaam daka sorkar neibynta i myntoi yaka jylla.
U Montri da kyntait u wow pynbaad ya kiwon kiwon ki seiñbhalang kiwa em haka jylla, hanla ki pulit da kem ki leh ya uwa yahkhmat ka KSU na South West Khasi Hills District, deiwa ong wa kitu kiwa kwah wow pynmih kulmar toh ki Gunda.
