Shillong: Uwa yahkhmat ka Congress ha kani ka jylla uwa man leh u MLA ka Nongthymmai Constituency, u Charles Pyngrope da ong u wa ki MLA ka Party waroh u neh bait ki hadooh wa kut kani ka samoi san snem, i tæ hadooh u snem 2023 wei ym em ka ya phet seiñ cheni cheitai.
Ya ini da ong u Charles hawa kylli hadien wa mih ki khubor wa em ki MLA ka Congress kiwa thmu wow kap dieñgkpær wow psiah cha kiwi won ki Party.
“Ha i sñiaw yong nga, wei hawa nga yaklam O wa ki kattu katni ki MLA, nga ym sñiaw O wa ki MLA ym mih ki naka Party hadooh u snem 2023, tangwa hadien yong ini ym ye O wow batai,” da ong u.
Kam wow pynkynmoo wa ha kini ki kajiak sngi wa da dep ka khubor da poor smat ko wa em ki MLA ka Congress kiwa thmu wow mih noh na ka seiñ hadien wa ka Congress da rem kput ko haka BJP wa yahkhmat da u Montri Rangbahdooh ka ri, u Narendra Modi ha waroh kawi ka ri India.
Hawa kylli hajrong i klam yong ka MLA ka Congress na East Shillong, ka Ampareen Lyngdoh wa ka daw mih noh ko na ka Party, neiliang u Charles da ong u, “Ha i yachem yong i ha ka party, ka Ampareen ym em pynsñiaw ko ya ini wei ya kiwa klam won ko chalait nga ym tip O.”
Da kyntait u leh wa ka Congress daw ngam noh ko du neidaw wa ym em de ko hei bor ha ka sorkar pyrdi næ ha kani ka jylla.
“Katni u phet phi du neidaw wa ym em ha ka sorkar ha Delhi, man ko ka kaam ke,” da ong u deiwa pynrap, “Ka Anti-Defection Law man ko kawa bha wow khang ya ki MLA neibhah ki MLA nachwa phet katwa kwah ki.”
Ha iwi won i liang u Pyngrope da ong u wa ka kaam yahkhmat ha ka Congress Legislature Party (CLP) u neh hi ko wa u Dr. Mukul Sangma wei ym emkaam næ ka dawa wow pynkylla ya uwa yahkhmat.
Discussion about this post