Ki wakreh ka GHADC hapoh ka lama ka Non-Gazetted Employee Association (NGEA) lyngba ka kyrwoh wa phah da u Flaming B Marak, Formal Joint Secretary da pynsñiaw u yei kyrchaan yei yakhih ki paaid ka ri-loom Garo yow pyrchah ya u CEM wa thymme ka GHADC.
Da ong u wa u uni u CEM ym toh u jaitbru ri-loom wei katkam ka Sixth Schedule, ki Autonomous District Council toh du ya ki jaitbru ri-loom wei ha Meghalaya da em ki Garo, ki Khasi wa ki Jaiñtia.
Kamtæ da ong u CEM wa katni u Rakesh Newar Sangma ym toh u Garo wa paka neibhah da ri ya oo hei rukom ki Nepali ym toh katkam i rukom ki Garo wei yow tip yei rukom man ki Garo ym toh du deiwa puræ ya ki kot ki sla tangwa deiwa im wei deiwa heh, deiwa san kam u Garo.
Hajrong ini da ong wa kammon da u wym toh u Garo u wym tip chaphang ka dustur riti ki Garo u chong bichaar u ya ki Garo iwa da man leh kamwa yoobeiñ ya ka jaitbru Garo wei da toh u hiar chuki noh uni u CEM.
Da kdaw leh wa u Rakesh da yoh Contract u wow chna ya ka Rongjeng Model Degree College ha Rongjeng, East Garo Hills hei lut wa T. 8,97,63,567 yow chna ya ka yung wa ar mala tangwa da chna du chi mala donhi wei man ka yung man ko leh ka wym biang i chna kawa da sdang wow piah.
U Flaming B Marak da ong u leh wa ka diah u Rakesh ka Twinkle da yoh Contract ko T. 5,82,51,800 hapoh ka Special Assistance Central Plan Scheme 2015-16 yow pynmih ya ka phlim Documentary hajrong ki jaitbru Garo tangwa hadooh katni leh ym em yoo ya iwa da dep wow chna.
Heiyatoh wa kini ki kaam da dep wow ujor ha ka Lokayukta wei ka bichaar dang lai ko chakhmat.
Kamtæ da kyntu ya u Montri Rangbah ka jylla, u Conrad Sangma wow pynbait u ya ini i kaam uwa man leh kam u National President ka NPP kiwa da jied leh ya u Rakesh Newar Sangma, u wym toh u jaitbru ri-loom Garo wa thymme ka GHADC.
