Shillong: Ka High Level Committee ynne ka sngi da pynman ko yaka yalang waka Sub-Committee kawa da chna yow yaklam yei sñiaw yaphær hapyrdi ka sorkar Meghalaya waka Hima Mylliem heiyatoh waka Sweepers Colony namo ka Them Mator.
U symbood montri ka jylla u Prestone Tynsong da pyntip u wa u Chairman ka Sub-committee da wan e u yaka Report hajrong kani kaam wei da yaklam ya ini.
U Prestone Tynsong da pyntip u wa daw em biang sa kawi ka yalang wei yooluti u wa daw poi noh cha ka bynta wa khaddooh yow e won yaka Report cha ka sorkar jylla.
Hawa kylli iyi de iwa da yaklam, u Tynsong ym bien u wow khana tangwa da ong u wa hap wow e chwa cha ka sorkar yeiwa yaklam.
Da ong u leh wa ya ka yalang wa daw pynman daw pynman smat.
Kam wow pynkynmoo wa yaka High Level Committee hajrong ka Harijan Colony da chna daka sorkar jylla hajrong i dawa wow kyrriah ya kiwa chong ha kani ka thaw cha kiwi ki thaw heiwa da joor ini i dawa hadien wa mih i awri awra ha u Naiynru u 2018 iwa da neh boon sngi.
