U Montri wa pait ya ka chnat Forest & Environment, u James Sangma da pyntip u wa ka sorkar jylla dang yaklam ko hajrong i e Environmental Clearance da ka Ministry of Forest and Environment cha ka Star cement yow tih moochuni hapyrdi i joor i pyrchah ya ini.
“Dang yaklam i katni tangwa ym pu em chim ya ka rai yonglang wow tuklar ya ini i kaam kattæ,” da ong u James hawa kylli lada ka sorkar daw leh ko iyi iyi hajrong ini.
Hawa klam hajrong ka aiñ, da ong u wa da klam che wa lada em kiwon kiwon ki karkhana, emkaam ki wow yoh Environmental Clearance lada em ki hajan ki Reserve Forest.
“I e Environmental Clearance ymtoh iwa chong ha ka sorkar jylla wei toh i kaam ka Ministry of Forest and Environment & Climate Change wow leh ya ini katkam ki kyndon wa da booh wei wow pait leh kammon ktah ko ya ka imlang sahlang deiwa pynman ya ka Public Hearing,” da ong u.
Heiyatoh wa ini da ong u wa da pyrchang wow pynman Public Hearing la le sien tangwa da sepai waroh le sien.
“Kamtæ neidaw wym yoh u pynman Public Hearing la le sien neidaw wa em i pynthut, da chong ko ha ka Ministry of Environment & Forest lada kwah ki wow e Environmental Clearance lane ym boi wei ka Ministry da leh ko katkam i hok ko wei da e ko ya ini,” da pynche u.
Heijooh i por da ong u wa oo leh sñiawkhia u yeiwa ye u chah ktah ka rymaw, “Kam ka chnat wa pait ya ki khloo ki kjam, i leh sñiawthooh i ya ka kaamram wow pynneh pynsah ya ka rymaw hapoh ka jylla”.
Da pynrap u deiwa ong wa kam ka sorkar heijooh i por hap ko wow bood ya ki aiñ wa ki kyndon wa da booh wei da leh ya ini heiyatoh wa i e Environmental Clearance cha ka Start Cement iwa hap wow bood katkam ka aiñ.
