U Symbood Montri Rangbah ka jylla, u Prestone Tynsong da ong u wa ka khyrdop Entry/Exit Point kawa em ha Umling, Ri Bhoi District ym pu krehkaam ko pura kam ka khyrdop wa pait ya ki bru kiwa wan na baar ka jylla, tangwa da pynyang chwa wow pynkrehkaam manda yoh mynjur næ muhor na u Lat ka jylla ya ka Meghalaya Residents Safety and Security (Amendment) Act, 2019.
I booh yong ka sorkar ya ka khyrdop Entry/Exit Point ha Umling, Ri Bhoi District ha ka 20-12-20, da wanrah ko ya i wym hun katni na kiwa boon ki seiñbhalang, heiwa da em i pynbaad wa katai ka khyrdop toh du neibynta wow Test COVID-19 ya ki bru kiwa wan na baar ka jylla, wei wow pynsuk ya kiwa wan ke.
Hawa yaklam wa u Prestone ynne ka sngi, da ong u wa ym toh wow sñiawthooh bakla wa ka Entry/Exit Point toh em ko ha ka MRSS Amendment Act, 2019 wei iyi wa pynkrehkaam katni toh ka MRSSA, 2016 kawa booh kyndon bha ya kiwa wan chong yung wai hapoh ka jylla, la wan kreh næ wan puræ, tangwa ym em won hapoh yong ka wow booh ya ki khyrdop, iwa pynman ya ka sorkar wow wanrah yei pynkylla (Amendment) yow pait leh yei psiah ki waroh wa wan cha ka jylla, deiwa pynrap wa ka MRSS Amendment Act hadooh katni dang sahkut ko hapoh ka Ministry of Home Affairs.
U Prestone da ong u leh wa ka khyrdop kawa em ha Umling kamwa man katni, neidaw wym pu em wow yoh mynjur ya ka MRSS Amendment Act, ym pu ye wow pynkrehkaam pura kam ka thaw wow sylli ya ki baar jylla, tangwa katni dang pynemkaam kam ka Covid Check Point wei ha i jooh i por da yarap leh wow lum ya ki yutip yong waroh ki bru kiwa psiah cha ka jylla Meghalaya.
