Ka United Democratic Party da kyntait ko wa em yatoh lok chwa wa kiwi won ki seiñ saaiñpyrthai neibynta ka Election chiteiñ samoi ha ki le tylli ki Constituency kawa daw man ha ka 30 tarik u Naichiphaw, laitnoh ha Mawphlang wa da rai wow pynyakhun da i kyrchaan ka Hill State Peoples Democratic Party (HSPDP) kawa em hapoh ka Regional Democratic Alliance wa ka UDP.
Hawa klam wa ki laad pathai khubor, u President ka UDP, u Metbah Lyngdoh da ong u wa ka Party ym em ya kdoh ktien wow yalok chwa neibynta ka Election chiteiñ samoi, laitnoh ha Mawphlang wa ka HSPDP ym pynyakhun kyrtong ko. Katwa ha Mawryngkneng ka UDP daw chim rai la kammon kammon mynstep ka sngi, katwa neibynta ka Rajabala da ong wa ym pu em i yaklam wa ka NPP wow ya krehlang, heiwa da pyntip leh wa em ki kyrtong kiwa da pynsñiaw wa kwah ki wow yakhun ya ka Election na ka UDP ha Rajabala.
Hawa kylli, u Metbah da ong u wa ya katni ym pu em i yaklam wow em da u kyrtong wa hunlang yong ka sorkar synrop MDA ha ka Election chiteiñ samoi. Da pynsñiaw yei kyrmen wa ka UDP u jop ko ya ka Mawphlang.
Neiliang u General Secretary ka HSPDP, u Renikton L Tongkhar da pynsñiaw u wa ka Party ka hun ko wow kyrchaan ya u Eugene ha Mawphlang wei wot ha Mawryngkneng leh ka RDA daw ya krehlang.
