U MLA wa Montri warim ka jylla, u John Antonius Lyngdoh da ong u wa ym pu em da rai cheiwon wow kynthih hadien wa da mih noh na ka Bharatiya Janata Party (BJP).
U JA Lyngdoh da phah u ya ka chithi ieh kaam ynne ka sngi cha u President ka BJP, u Ernest Mawrie. I mih noh yong oo na ka BJP toh neidaw wa ha ki soo snem chiteiñ da chah leh mylliñ ha kiwa yahkhmat ka Party.
Hawa klam wa ki kattu katni kiwa thoh kubor, uwa yahkhmat warim ka BJP da ong u wa i mih yong oo na ka BJP ym toh wa em i thmu wow lai psiah cha kiwi ki Party, tangwa i mih noh na ka Party toh hadien wa da chah chitom u soo snem chiteiñ, kattæ leh chah kyntait u ha ki kaam waroh.
U JA Lyngdoh da chah rem u ha ka Election MLA 2018 na North Shillong hanla da yoh u palat 5000 Vote. Da ong u wa ym toh iwa suk wow yoh hadooh palat 5000 Vote na North Shillong kam u kyrtong ka BJP, tangwa ki paidbah da pynyoo ki yei chaniah ha katai ka Election neibhah da jied ya u bru ym ya ka Party.
Da ong u wa i em yong oo ha ka BJP ym toh neibynta ka Ticket wow yakhun Election wei bynrap u wym pu chim leh yei rai lada daw yakhun næ ym yakhun ya ka Election MLA wow man ha u snem 2023, wei ya kawa hadien ym pu pyrkhat.
Kam wow pynkynmoo wa ka North Shillong toh kawi na ki Constituency kawa daw mih boon bha ki kyrtong wow yakhun ya ka Election MLA 2023, wei kiwa boon na ki seiñ saiñpyrthai da dep ki wow pynbna leh ya ki kyrtong lait noh ka Congress.
Puræ leh: Mih noh u JA Lyngdoh na ka BJP deiwa beiñ ya u Ernest Mawrie
