U Montri Rangbah ka jylla u Conrad Sangma da ong u ynne ka sngi wa ym em iwon iwon i ya soi soskular yow ekti ya ka Jaintia Distribution Circle cha ki Company ka sorkar pyrdi lane cha ki Company ki bru samen.
“Ini da wan i ha ka Cabinet, wei daw pait biang i ya ini ha waroh i liang wei daw chim ya i rai ha ka tayaw wow wan wa lada man iwa biang ya ka sorkar wow kit ya waroh ka ram wei wow su ya waroh iwa sah yow pynlait noh ya ka MeECL iwa da jooh leh da boonsien namo u thooh i da iwi i rukom krehkaam yow pynpliah yow pynryntih yei krehkaam deiwa khlem ktah ya iwa da em chwa hapoh ka MeECL deilang wa ki wakreh yong ka,” da ong u Conrad.
Da ong u leh wa ka Cabinet ym pu em rai ko da kawon ka luti wow chim wei ka sorkar daw pynlut ko ya kini ki 4-5 sngi yow pait ya waroh ki laad ki luti, wei daw khut lang ya waroh kiwa embynta ha ini i kaam chwa wow chim ya i rai.
Da pynche u leh wa lada ka sorkar lai ko chakhmat u man ko du kam ka Management Contract yow pait yei krehkaam ym toh deiwa e wai ya iyi iyi leh wa kynthup ya ki tiar ki tar cha kiwon kiwon.
U Conrad da ong u leh wa nadooh wa sdang ka MeECL waka chnat bordiñ wa u Montri leh da pyrchah ki yei leh katkam wa da tyrwa da ka REC (Rural Electrification Corporation).
“Ka MeECL ym em kwah ko wow ekti cha wi ya kiwon kiwon ki Circle yong ki. Ka chnat bordiñ wa u Montri ka chnat leh ym em kwah u wow e ya kawon kawon ka Circle yow chimkti da kiwon kiwon neibhah kwah ki wow pynlai ya ki Circle da ki hi,” da ong u Montri Rangbah.
Hawa pynche chooh chooh hajrong ini, u Conrad da pyntip u wa ka sorkar jylla ynnin u snem da chim ko ya ka ram wa T. 1345 klur hapoh ka Aatma Nirbhar Loan na ka REC yow pynkhooid lut ya waroh ki ram wa sah ha kiwa boon ki Company pynmih bordiñ, heiwa ka REC waka Power Finance Corporation (PFC) da phah ki wa ka sorkar Meghalaya wa toh u e ko yei kular kamjooh wow booh ha ka mang poisa ka jylla yow su ya ka ram ka MeECL, iwa mut wa ka MeECL lada ym ye ko su ya ka sut wa ka ram man-u-bnai ka REC daw ah ko ya ka poisa na ka RBI syndon.
“Ka REC da kwah ko ya ka sorkar Meghalaya wow su waroh 100% kawa da booh ha ka mang poisa wei wow phah ya ki heh ki chnat poisa poilaiñ yow ye ki wow su cha ka REC,” da khana u Montri Rangbah.
U Conrad da khana u leh wa ka chnat muna tyngka da ong ko wa ym ye wow su chisien su ya ka ram kawa da kynjoh T. 120 klur neibynta ki 3 snem wa nyngkong, iwa daw ku cha T. 300 klur neibhah daw hap wow su sa ya poisa wa chim ram (Principal Amount) hadien 3 snem won.
“Hawa yaklam i wa ka REC iyi wa ye i wow leh, ka REC da ong ko wa em boon ki Circle hapoh ka MeECL kiwa em ya ka AT&C Loss namo kiwa dooh nong iwa ym yahap wa ka bordiñ wa da e wa ka bai bordiñ wa ye u pynlang iwa em nadooh 30% hadooh 72%. Kamtæ ka REC da ong ko wa lada ym ye wow booh hapoh ka mang tyngka yow su ya ka ram, toh u e kattu katni Percent i hok saam bordiñ cha ka REC ka wow pait wei pynlai ya ini,” da ong u Conrad.
U Conrad da ong u wa ka Finance Department leh da sñiaw ko yei emkaam ya ka MeECL wow pynbha pynmiat yei ye ko wow krehkaam.
“Da boon snem kiwa boon ki Circle da krehkaam ki deiwa dooh nong 70%, 50%, 30%, kamtæ da ong u wa hawa chim ya ka ram, ka sorkar jylla da kyrchaan ko ya ka MeECL, tangwa 25% ka yukit toh u em ko ha ka MeECL wei ileh wa ka sorkar Meghalaya hap ko wow lai pynlait ya ka MeECL ha waroh i por,” da ong chooh chooh u.
