U MLA wa samen na Mawphlang, u Syntar Klas Sunn ynne ka sngi da paan pynche u hajrong i yaphær wow baam ya i ja wa i dih ya i kiad na u montri ka chnat Excise ha ka yung dorbar chna aiñ ka jylla.
Heiyatoh wa ini, neiliang u Montri Rangbah ka jylla, u Conrad Kongal Sangma da yarap jubab u yeini i kylli u MLA deiwa ong wa ini i kylli yah i cha iwi tawon i kaam.
Da ong u wa i ja man i iwa emkaam wa kongsan ya ki bru katwa i kiad won chong i hei mon ki bru samen.
Hawa yatoh wa i kylli pynrap wa ka sorkar ym pu tipmit ko da ka aiñ ya i kiad wa chna chna na u khoo hapoh ka jylla kamwa man i kiad wa chna ha Japan iwa tip kam i ‘Sake’ yow pynku yei mih poisa kamjooh i yoh kreh, u Conrad da ong u wa ym pu ye wow tipmit neibhah ka jylla ka dang duna khoo ko wot wow baam. Da pyntip u leh wa ka jylla dang ye ko wow pynmih du 3 lak metric ton u khoo, wa sa 1 lak metric ton ka jylla dang duna khoo ko uwa hap wow pyndap baam.
Chwa ini, hawa jubab yeiwa da kylli, neiliang u Montri ka chnat Excise, u Kyrmen Shylla da ong u wa ka sorkar hadooh ynne ympu yaklam ko wow tipmit ya i kiad wa pynmih na ka jylla.
Ha iwi i liang u Kyrmen da pyntip u wa em iwi donhi i dor iwa man ka dan lyngba ka Meghalaya Value Added Tax Act, 2003, wa da chim da ka chnat na kiwa dai kiad pharæng namo ki Indian Made Foreign Liquor (IMFL) iwa man 40% nadooh u Wisu 2017.
Da pyntip u leh wa ka dan wa da yoh lyngba ka Value Added Tax na ki kiad wa haap ha ka IMFL ha u snem 2017-18 man ko T. 180 klur, 2018-19 man ko T. 160 klur, 2019-20 man ko T. 204.31 klur wei nadooh u 2020 hadooh u Duyatra uni u snem man ko T.140 klur.
