Uwa pait ya ka BJP Meghalaya u Chuba Ao ynne ka sngi, da ong u wa ka Party da e bor ko ya i kaam kam u President ka BJP Meghalaya ha u Rikman Momin hadien wa da bichaar ya i rukom kreh u wa i kitkhlieh yong oo katkam wa da pynkham ha oo.
Da ong u wa u Rikman toh u bru wa kreh wer-wer khlem pynyoo pyrthai ha kini ki snem waroh wei da em i yajan u wa ki paidbah.
Hawa pynksan nia yeiwa chah pynbaad u President warim, u Ernest Mawrie, u Chuba da ong u wa uwon uwon uwa man President ymye u wow pyntun lut ya waroh wei oo leh da maad u yeini heipor wa man u kam u President ka BJP ha Nagaland.
Hajrong ka Election MP, da ong u wa ka Party dang pynkhreh ko wei hadooh katni ympu em wa wan paan Ticket wei ka Party dang bichaar wei dang pait bniah chwa ko yei long i man i saaiñ pyrthai wei daw pynbna kyrtong MP ha i por wa biang.
Neiliang won u President wa thymme ka BJP Meghalaya, u Rikman G Momin da ong u wa i kaamram wa kongsan yong oo toh wow pynkhlan ya ka Party ha kani ka jylla.
U Rikman kam uwa da dep yakhun MP naka BJP ha u snem 2019 na Tura da ong u wa lada yoh ya ka hukum na ka seiñ bei daw sdang noh wut-wut wow kreh neibynta ka Election.
Da ong u leh wa ki paidbah daw pdiang ki ya ka BJP ha kani ka jylla neibhah wa u Montri Rangbahdooh ka ri, u Narendra Modi da wanrah u chiboon ki Scheme wa ki kaam pynroi wei ka thong yong oo toh wow pynche cha ki paidbah yei myntoi wa da wanrah ka sorkar BJP.
Discussion about this post