Hadien chi sngi wa ka seiñ kieñ tiar ka HNLC da booh ko ya u IED Bomb ha nongbah Shillong, u Montri ka chnat Kaam Pohyung ka jylla u Lahkmen Rymbui da phah u ya ka chnat pulit wow pynkhlan wei pynjoor ya i kaam ka chnat takit ki pulit.
“Ka chnat pulit hap ko wow pait kammon wow pynkhlan ya i kaam thooh bniah ya kiwa da dep wow leh wa kiwa emkaam wow leh chooh chooh,” da ong u Lahkmen hawa klam cha ki laad pathai khubor ynne ka sngi wei heijooh i por da kyntait u wow pdiang wa toh i tlot i takit.
Hadien i hær rngu ki paidbah nei booh Bomb ha ka sngi Nyngkong ha nongbah Shillong, da mih i kylli wa lada ka sorkar Meghalaya wa ka chnat pulit ki pait khmat bait ki du ya ki thaw wa em i maa.
Hawa kylli, u Lahkmen da ong u wa mynjur u du ya ki kattu katni wa ka chnat pulit da jooh pyrchang ki wow pait du cha ki thaw wa em i maa wei da ieh ya kiwi ki thaw ki wym da ye u chah ktah.
“Toh i kaamram yong ki pulit wa kam ini i jia da pynman ya ka chnat wym toh u kheiñstiñ tangwa wow pyntikna wa ye u yada na kam ini i jia,” da ong u Montri.
Chooh chooh hawa kylli won hajrong i maham ya kiwa yahkhmat ki seiñ saiñhima kamjooh ya ki Montri sorkar ha ka HNLC, u Lahkmen da ong u wa i kaamram yong ka sorkar toh wow pynbiang ki laad yada ya uwi pa uwi uwa chong chnong wei iwa hakhmat dooh yong ki pulit u man ko wow pait wa uwi pa uwi uwa chong chnong u yoh ki yei yada.
Hawa kylli kammon sñiaw u yei pteiñ ka HNLC wow lai chakhmat ya ki kaam pyntieñ wot hadien wa da pynsñiaw yei kwah u yaklam yasuk, u Lahkmen da ong u wa neiliang yong ka sorkar da dep ko wow klam che wa ym ye wow pynbait ya iyi iyi lyngba i yaleh.
Ka sorkar India da dep ko wow pynsñiaw wa kiwon kiwon ki seiñ kieñ tiar toh u sangeh noh ki chisyndon ya ki kaam pyntieñ wei wow wan chakhmat neibynta i yaklam hapoh u pood u ang yong ka riti synchaar ka ri, da ong u Montri.
Hawa yatoh wa i booh Bomb hakhmat ka yung krehkaam ka NPP iwa da kam wa leh da ka HNLC, neiliang u Montri ka chnat Kaam Pohyung da ong u wa ka takit dang lai ko chakhmat wei neiliang ka chnat pulit da chim lut ki laad ki luti hawa yatoh wa i maham ka HNLC.
Chooh chooh da pyntip wa hadooh katni, ki pulit ym pu yoh ki wow kem ya uwon uwon leh kiwa emkti ha ini i kaam.
