Jowai: Ka Bataw PHC, East Jaiñtia Hills District, kawa da dep wow pynku kyrdan naka Sub-Center cha ka PHC nadooh u snem 1997, tangwa hadooh katni kani ka PHC da sah ko du hei pyrtuid PHC khlem da wai yaka kam ka PHC wa pura yong ka Bataw.
Neiliang ka Southern Border Youth Welfare Association (SBYWA), hapoh i yahkhmat u President wa u General Secretary ka Association u Skhembor Shadap wa u Namphrangmi Talang wa ki dkhot ha i lai pait ki ya kani ka thaw sumaar da chem ki ya kiwa boon ki duna kam ka PHC hanlada ym pu em wai yaka wei ym tip iyi i daw wa hadooh katni ym pu em wai yaka kam ka PHC.
Katkam ka jubab lyngba ka RTI wa ka Association da yoh ko, da chem wa kani ka PHC wa ki Nurse toh u em ki soo ngut tangwa da em du ar ngut, i kaam Doctor AYUSH dang man ko kawa thylli, i wym biang i bordiñ, ym em u næ ka Head Assistant, ki Lab Technician, kiwa kreh kam kiwa pynkhooid dang em du uwi wei dang emkaam chooh, ka kari kit wa kjut (Ambulance) leh ym em, ka Maternity Mother and Child Health dang duna nadong chadong, ka um wa kiwi de kiwa emkaam.
Neiliang kiwa yahkhmat ka seiñ da dawa ki naka sorkar khamtam ka chnat ka chait ka khiah wow pynbiang ya ini i emkaam wa ki duna yong kani ka PHC, wei da dawa leh wow wai noh yaka kam ka PHC wa pura, khnang waki paidbah yong katai ka thaaiñ khappood waka Bangladesh u yoh yarap wei yoh myntoi ki na kani ka thaw e sumaar.
Ki SBYWA da ong ko leh wa daw yahcem ki mar khmat wa u montri ka chait ka khiah wow dawa smat na oo wow leh ya iwa emkaam yong kani ka PHC ka Bataw.
Discussion about this post