U President ka Meghalaya Pradesh Congress Committee (MPCC), u Vincent H Pala da ong u wa ki paidbah ki pynsñiaw ki wa u MLA ka Umroi, u George B Lyngdoh toh uwa yahkhmat wa kongsan yong ka Party wei uwa ye wow man kam uwa yahkhmat wa biang yong ka jylla, wei ka Party ka da dep ko wow rai wym pyndooh Ticket ya uwon uwon u MLA næ u MDC lada kwah ki wow yakhun ya ka Election.
Kam wow pynkynmoo wa u Working President warim ka MPCC, u James Lyngdoh da pynbaad wa u Pala da em u i thmu wow pyndooh Ticket ya u George B Lyngdoh uwa da lai pynyabi katni wa ka AITC, wei i thmu wow pyndooh Ticket toh du neidaw wym em poisa u wei wa klam pyrchah u ya i rukom kheiñ dan na ki Petrol Pump wa i chalan pyrchah aiñ ya u mooyong.
Hawa kylli ynne ka sngi hajrong ini i pynbaad, u Pala da ong wa toh du i pynbaad wa khlem yurim wei da kam u wa nadooh wa man MP u, ym em de pynlai u ya ki Petrol Pump wei khlem da kreh mooyong de u. Da ong chooh chooh wa ki paidbah leh klam ki wa u George toh uwa yahkhmat ka Party.
U Pala da ong u wa i pynbaad pyrchah ya oo wa yaka Congress toh i wym yoh daw ki lait du wow pynbiej ya ki paidbah ya iwa da phah hi-eh wow klam ha u James.
U Vincent da ong u leh wa u George um toh u bru wa mahajon ha i por wa yaleh Election, tangwa waroh kam ka Party ki da kyrchaan ki ha itu i por, wei wow pynbaad wa daw pyndooh Ticket neibynta ka poisa toh du nei thmu wow pynbood naam neibhah wym em ki da iwi wow pynbaad.
