U Montri wa pait ya ki kaam pynroi sor (Urban Affairs), u Sniawbhalang Dhar da ong u wa du lada ki paidbah u mynjur ki, daw lai chakhmat yei thmu wow booh ya ka thaw noh jhep (Sanitary Landfill) ha ka chnong Kyrdem kawa em ha Ri-Bhoi District.
Hawa jubab yeiwa kylli ynne ka sngi hapoh ka Yung Dorbar, da pyntip u wa hadooh katni ya ka Detailed Project Report (DPR) ym pu ym dep pynkhreh ya ka hanla ka sorkar da dep mang ko wow chim hadooh kamwa 200 Acre i thaw ha katai ka chnong, neibhah wa kwah wow ap chwa ya ki paidbah yong ka thaaiñ.
U Montri da pyntip u wa neiliang ka chnat da dep wow pynman leh ya ka Public Hearing namo ka pynsñiaw paidbah ha ka 8 tarik u Duyatra (Jan) 2022 hajrong itai i thmu, heiwa da pyntip leh wa em kiwa pyrchah ya itai i thmu, wei ka sorkar dang yang ko katni ya ka bui (Report) na ka yung krehkaam u Deputy Commissioner ka Ri-Bhoi District wei da pynsñiaw wa ka sorkar ym leh pyrchah ko ya i mon ki paidbah wei daw bichaar ya itai i thmu.
Da ong u leh wa neibynta ini i kaam, ka chnat daw lai bait ko katkam ki kyndon ka Solid Waste Management Rules 2016.
Hawa wanrah yei yukylli, u George B Lyngdoh uwa man u MLA ka Umroi da ong u wa kiwa chong chnong yong ka thaaiñ ki kulmar ki hajrong itai i thmu jong ka sorkar, deiwa pyntip leh wa ha katai ka thaw em leh ki wahdooid wa ki tyllong um. Da pyntip u leh wa ha ka Public Hearing da em du ki kattu katni ngut kiwa chah khut, wei wot oo leh kam u MLA ym tip u iyi iyi yei thmu yong ka sorkar.
U MLA ka Umroi da kyntu u leh ya ka chnat wa ka toh u pyntip ko deiwa biang cha waroh ki paidbah, wei kamjooh wow pyntip lang ya u MLA, neibhah hadien wa mih i eh ki paidbah, daw lai thooh ki ya u MLA yow phah tuklar.
