Ka sorkar jylla da klam che ko wym ye u pynhiar næ pynduna ya ka dan i phñiang kari (Petrol/Diesel) hanla em i ku smat i dor ha kini ki kajiak sngi wa dadep.
Hawa klam hadien ka yalang ki Montri sorkar, u Montri Rangbah ka jylla, u Conrad K Sangma da ong u wa ki sorkar jylla ye ki wow leh yeini, tangwa hawa nujor wa kiwi ki jylla, ka dan wa chim ka sorkar na ki Petrol Pump rap duna ko bar ya kiwi ki jylla.
Da ong u wa lada dang pynhiar ya ka dan daw ktah yeiwa ye ka sorkar jylla u pynmih neibhah ka leh em ko iwa hap ko u pynlut, wei ka jylla wa khian kam ka Meghalaya toh kawa duna i mih wei lada rai u pynduna ya ka dan daw hap wow pyrkhat leh yei chah ktah lada duna iwa pynmih.
Da ong u i ku dor i phñiang da ktah ko ya waroh kawi ka pyrthai, wei da man ki daw kiwa na baar neiwa em ka thma, wei da pynrap u wa kiwa boon kiwi da pyrkhiñ leh wow e phñiang cha ki paidbah, tangwa ha India ym pu poi hadooh utæ u pood.
Neiliang u Montri Rangbah da kyntu u ya ki paidbah wow ya krehlang ha kam ini i por wa em i eh, wei da ong chooh chooh u wa lada nujor wa kiwi, i dor phñiang ha Meghalaya rap duna ko bar ya kiwi ki thaw, wei ka sorkar daw pyntikna ko wym em i duna phñiang ha ka jylla.
Discussion about this post