U Prime Minister ka ri u Narendra Modi hawa klam cha ka ri da ong u wa ym emkaam wow pynkrehkaam biang ya ka Lockdown hapoh ka ri wei toh wow yaleh yow yait nei pynkrehkaam biang ya ka Lockdown deiwa bood ya ki kyndon yada COVID-19.
U Modi hei klam yong oo da kyntu u ya ki sorkar jylla wow leh ya ka Lockdown du lada kut laad donhi wei wow pynkrehkaam da ki Micro Containment yow kdooh u khoom yei poor ka khlam.
Da kyntu u leh ya ki sorkar jylla wow pynkohngooh yaki bru wa wankreh na baar wow neh ki ha ki thaw wa em ki.
Da ong u wa ynnin u snem da pynkrehkaam ya ka Lockdown toh neidaw wa ka ri ym biang ko ya ki dawai, ki PPE Kits kamjooh ka chemphang wa kammon wow yaleh wa kani ka kaam, tangwa katni da man i kiwa da pynkhreh deiwa chimbynta lang ki paidbah wow bood ryntih ya ki kyndon.
Da kyntu u leh ya ki khynroo wow yarap yow lait nei pynkrehkaam ya ki Containment Zone, Curfew kamjooh ya ka Lockdown deiwa chna ki ya ki dhab wa khian kiwa pyntikna wa ki paidbah bood ki ya ki kyndon yada na u COVID-19.
Heiyatoh wa mih khubor wa duna la-ær Oxygen hapoh ka ri, u Prime Minister da kular u wa da leh katwa ye yow pyndap Oxygen deiwa pynbiang da ki lak tylli ki tadong Oxygen cha ki karkhana wa pynmih Oxygen.
Chooh chooh da ong wa ki karkhana pynmih dawai leh da pynkhlan ki yei bor yong ki wow chna dawai yow ye u pyndap yei emkaam dawai yada COVID-19.
Da phah u leh ya ka khubor sñiawlem cha kitu ki yung ki sem wa dooh yei mynsien neidaw wa ku biang i joor ka khlam.
