Ka National People’s Party (NPP) da rai ko wym pynyieñ kyrtong de na Ranikor Constituency, hadien wa u kyrtong ka Party wa da dep wow pynbna, u Martin M Danggo da mih noh u deilang wa kiwa kyrchaan yow lai psiah cha ka Bharatiya Janata Party (BJP).
Katkam wa khana u Kitborlang Nongrem uwa man u President ka NPYF wa u Nebi T. Sangma uwa man u President ka NPP Ranikor Block, da ong u wa ya ini i rai da chim ha ka yalang wa jhan yong ka State Election Committee, kawa da man ynne ka sngi heiwa da emlang leh u National President wa u National Vice President, u Conrad K Sangma wa u Prestone Tynsong.
Ka NPP yong ka Ranikor Block ha 1 tarik uni u bnai da pynman ki ya ka yalang wa jhan ha chnong Mawthynrew Rangthong, South West Khasi Hills District, wei ha kani ka yalang, ka NPP Ranikor Block da rai ko wow phah yei pyrtuid yong u Nelbi T.Sangma wa u Kitborlang Nongrem.
Neiliang u Nongrem da ong u wa i daw wa ka Party da rai ko wym pynyieñ kyrtong de na Ranikor toh neidaw wa i por da duna palat i wei ym ye de u pynkhreh.
