Shillong: U montri wa pait ya ka kaam pynroi sor ka jylla, u Hamletson Dohling da ong u wa ym slem de ka sorkar jylla daw pynbna noh ko wow pynlait ya ka aiñ chna yung ka Meghalaya Urban Development Authority (MUDA) ha ki thaw wa haap hapoh ka Municipal.
“Ka sorkar ka lai ko chakhmat wow pynlait noh ya waroh ki thaw wym toh wa pait ka Municipal na ki aiñ chna yung ka MUDA wei wow e kti noh ha ki aiñ yong ka District Council,” da ong u Hamlet.
Hawa yaklam ha kawi ka yalang wa pynman ha Mylliem, u Hamlet da ong u wa ki aiñ chna yung ka MUDA ym krehkaam ki ha ki thaw ka District Council (Scheduled Areas) kiwa haap hapoh ka Mylliem Constituency nadooh ka 06-08-18.
“Ki paidbah ym emkaam de ki wow lai paan yei thoh na ka MUDA wow yoh rin bordiñ næ wow yoh umbam nadooh u Naisaphra u snem wa da dep, katni dang yang i ya ka rai ki Cabinet wow pynbna paidbah ya kani ka rai,” da ong u Hamlet.
“Ka kam toh kawa hap lai lyngba boon tylli ki chnat, katni dang em ko ha ka chnat aiñ (Law Department) ka jylla wow pyndep ya iwa emkaam katkam ka Meghalaya Building Bye Laws & Town Planning Act 1973. I da dep pynbiang lut ya kiwa emkaam waroh wei u rah noh syndon ha ka yalang ka kynhun montri wow yoh ya ka mynjur ha chwa wow pynbna paidbah,” ong u Hamlet.
Discussion about this post