U Prime Minister, Narendra Modi ynne lynbga ka Video Conference da booh u ya ki mooyurim yow pynchna thymme ya 508 tylli ki Railway Stations ha kylleiñ ka ri hei lut wa T. 24,470 klur.
Kini ki 508 tylli ki Station toh kiwa em ha 27 tylli ki jylla wa Union Territory, heiwa mar 55 tylli toh kiwa em ha Uttar Pradesh wa Rajasthan, 49 tylli ha Bihar, 44 tylli ha Maharashtra, 37 tylli ha West Bengal, 34 tylli ha Madhya Pradesh, 32 tylli ha Assam, 25 tylli ha Odisha, 22 tylli ha Punjab, mar 21 tylli ha Gujarat wa Telangana, 20 tylli ha Jharkhand, mar 18 tylli ha Andhra Pradesh wa Tamil Nadu, 15 tylli ha Haryana wa 13 tylli ha Karnataka wa kiwi de.
U Prime Minister da ong u wa awjan waroh ki 1300 tylli kiwa emkaam bha ki Railway Station hapoh ka ri u pynchna ya ki katkam ka juk wa katni yow man ki kam ki ‘Amrit Bharat Station’. Na kini ki 1300 tylli ki Railway Station, da booh mooyurim ynne ka sngi ya ki 508 tylli ki wow man kam ki Amrit Bharat Station.
Da khana u leh wa ini daw yarap bha ko ya waroh ki jylla ka ri wei wei 55 tylli ki Amrit Station daw pynchna hei lut wa T. 4,000 klur ha Uttar Pradesh wa Rajasthan, 34 tylli ha Madhya Pradesh hei dor wa T. 1,000 klur, 44 tylli ha Maharashtra hei dor wa T. 1,500 klur wei ki Railway Station wa heh ha Tamil Nadu, Karnataka wa Kerala toh kiwa daw pynchna deiwi.
Da kdaw u wa ha kini ki 9 snem wa da lai, i jrong ki luti rel wa da dep booh dang tam i lada kheiñlang ki luti rel wa em ha South Africa, Ukraine, Poland, UK wa Sweden wei du ha chi snem wa da lai da dep wow pynchna luti rel iwa jrong palat yeiwa emlang ka South Korea, New Zealand wa Australia.
Da ban joor u leh yeiwa emkaam u sarong yei yong i hi iwa da em nadooh warim ‘Azadi Ka Amrit Kaal’ wei kini ki Amrit Railway Station toh kam chibynta wow pynneh pynsah yei yong ki warim deiwa pynyoo leh ya ka dustur riti, wa ki parom yong ki chnong wa em ki deiwa e nongmuna wa ka Jaipur Railway Station daw em ko ha ka kajiak ka Hawa Mahal wa Amer Fort Rajasthan, ka Jammu Tawi Railway Station ha Jammu and Kashmir daw chna deiwa pynbood yei dur ka Raghunath Mandir katwa ka Dimapur Station ha Nagaland daw pynyoo ko ya ki 16 tylli ki jaitbru wa em ha ka thaaiñ yong ki.
Hawa klam won ya ka thaaiñ North East, da ong u wa i kreh da lai bha i chakhmat yow pynboon ya ki luti rel da ar chah, u pynheh leh ya ki luti rel warim, u pynkylla leh cha ka bordiñ. “Ym slem de waroh ki nongbah ka North East daw pynyabi ki da ki luti rel”, da ong u Modi deiwa pynrap wa ka Nagaland daw yoh ko katni ya ka Station wa ar hadien 100 snem. “I e bor wow sdang ya ki luti rel wa thymme ha ka thaaiñ toh iwa da ku da le chah,” da ong u.
Heiyatoh wa i yoh khih yoh khan, da khana u wa ka chnat Railway da e kreh ko ya palat 1.5 lak ngut ki khynroo wei ka sorkar da booh thong ko wow e kreh ya 10 lak ngut ki khynroo lyngba ka Rozgar Mela.
Discussion about this post