U Montri wa pait ya ka chnat Animal Husbandry & Veterinary ka jylla, u Alexander Laloo Hek da ong u wa em i yoh kjut African Swine Fever yong ki sñiang ha ki kattu katni ki thaw tangwa da ye wow kdoh u khoom wei ym em yoh i wow poor.
Da ong u wa hadooh katni, ka sorkar ym pu sñiaw emkaam ko wow khang ya ki paidbah wow baam doh sñiang, neibhah ym toh ka kjut wa poor, tangwa da jia hi-eh du ha ki kattu katni ki thaw yeiwa da ye u khang yei poor ini i kjut.
Da khana u wa i yoh kjut African Swine Fever da sdang chwa na Garo Hills, wei neiliang ka chnat da khang ko sbak 5 Km soodong nei thaw wa em ki sñiang kiwa kjut, hadien ini da phah ya ka Rapid Response Team yow pyntikna wym em i poor ini i kjut.
U Hek da khana u leh wa ha kini ki sngi da jia biang i yoh kjut ki sñiang ha ki 3 tylli ki thaw ha Khasi-Jaiñtia Hills, wei neiliang ka chnat da khang biang ko sbak 1 Km soodong yow lait u sai ya kiwon kiwon ki sñiang na kitai ki thaw, wei ym em hi leh i poor i kjut ne i yoh kjut kiwi ki sñiang.
