U Symbood Montri Rangbah wa pait yaka chnat Kaam Pohyung (Police), u Prestone Tynsong da ong wa ka sorkar ym thung kreh biang ko ya ki 3 ngut ki Investigating Officer yong ka Lokayukta kiwa da chah pyndam kreh haka sorkar. Da ong chooh chooh wa yoo lakam wa ki 3 ngut kini ki Officer wa chah pyndam kreh emyatoh ki wa ki bru ka Voice of the People Party (VPP).
Ka VPP ynnin ka sngi da pynman ko yei yakhih wow dawa na ka sorkar yow thung kreh biang ya 3 ngut ki Investigating Officer kiwa da chah pyndam noh haka sorkar ha u Kmaichonglad (Dec) 2023, neidaw wym em thoh hapoh ka aiñ wa ki Officer wa em hapoh ka Meghalaya Lokayukta toh u man ki kiwa dang kreh, neibhah ki Officer wa em hapoh ka Lokayukta ymtoh u duna yaka kyrdan wa emkaam wa da booh katkam ka aiñ, wei ym phær lada dang kreh ki næ kiwa da chong-ngiah nei kaam sorkar.
Hawa klam wa ki laad pathai khubor, u Prestone da ong u wa i dawa yong ka VPP wow thung kreh biang ya ki Officer wa da chah pyndam toh hajrong kayi ka yurim?, neibhah ka sorkar da dep pyndap ko ya kitai ki 3 tylli ki kaam, wei da ong chooh chooh wa i thung ya kitu ki Officer toh da ka Contract.
Chooh chooh da ong u wa lada thung da ki Officer kiwa dang em hei kaam daw pynduna ko leh yei lut neibhah ym emkaam wow su tulop wei hajrong ini waroh kiwa boon ka sorkar da yatai sani bha wei da phah yei pyrtuid yong ki Officer kiwa kreh chitom hapoh ki chnat sorkar.
Hajrong i pynbaad wa da pyndam kreh ya ki 3 ngut ki IO yong ka Lokayukta toh neidaw wa takit hajrong i kaam baam tooh i chna yaka MDC Hostel yong ka GHADC wa da pynbaad wa emkti lang wa u boo u Montri Rangbah uwa man leh kam u MLA katni, neiliang u Prestone da ong lada man kamtæ kammon u Chairman ka Lokayukta dang neh u neibhah ki 3 ngut kiwa chah beh toh kiwa kreh hapoh yong oo.
Discussion about this post