Hanla ka jylla Meghalaya da dep ko wow mynjur da ka Resolution hapoh ka yung dorbar chna aiñ wow dawa pynkrehkaam noh ya ka Inner Line Permit (ILP) kattu la chisnem chiteiñ, tangwa hadooh katni kani ka Resolution ym pu ye ko wow pynmih ya u soh wei ym pu em leh ki dak wa ka jylla daw yoh ko ya ka ILP kamwa da yooluti.
Neiliang ka sorkar jylla da dep ko wow pyntip wa u Montri Kaam Pohyung ka ri India, u Amit Shah daw wan yooh kjat biang u ha nongbah Shillong ha ka tayaw wa ar yong u Naiyñiaw uni u snem, tangwa neiliang u Montri ka sorkar jylla uwa leh u MLA ka BJP, u AL Hek da ong u wa i wan yong u Amit Shah man ko du neibynta ki Scheme, ki kaam pynroi wa ki kam khappood, tangwa ym em i pyntikna wa daw yaklam ya i dawa ILP ha ka jylla.
Hawa kylli ynne ka sngi, uwa yahkhmat ka BJP da ong u wa kamwa man katni, ym pu ye wow ong wa ki seiñbhalang daw yoh ki næ ym yoh wow yachem ya u Amit Shah wow yaklam hajrong kiwi ki phang, katwa ya ka ILP won chong ha i rai yong ka sorkar lada daw rah ko næ ym rah hakhmat u Home Minister.
