U Symbood Montri Rangbah ka jylla, u Prestone Tynsong ynne da kylli u ya i daw wa kwah ka liang pyrchah wow pait ka Kasari yei takit hajrong i tih mooyong tooh hapoh ka jylla.
“Ym tip neiyi i daw wa u khlieh ka liang pyrchah (Leader of Opposition) u Dr. Mukul Sangma kwah u wow em biang i takit wow ngam yillu hajrong i tih mooyong tooh ha Meghalaya hawa ka NGT (National Green Tribunal) da booddien ko ya ini i kaam dei langær,” da ong u Prestone.
U Prestone da ong u wa da em ka takit wa da thung chwa da ka NGT, deiwa pynrap wa ka sorkar nachwa wa kawa katni da pyntikna ko wa ym em i tih mooyong tooh nadooh wa khang ya i tih mooyong ha Meghalaya nadooh u 2014.
Da ong chooh chooh u wa ka sorkar da phah ko ya waroh ki bor District wa ki bor pulit ha ki District wow sylli bniah yeini i kaam.
Kam wow kdaw heini, u khlieh ka AITC hapoh ka jylla, u Dr. Mukul Sangma ynnin ka sngi da dawa u ya ka takit wa laitlooid wow pait da ka Kasari hajrong i tih wa i khayi mooyong tooh hapoh ka jylla hadien wa wan sylli u ya ki thaw tih mooyong ha South Garo Hills chirup wa ki kattu katni ngut ki MDC ka AITC na GHADC.
