U President ka Bharatiya Janata Party (BJP) Meghalaya, u Ernest Mawrie da ong u wa ka party ym tip ko wa em i yaklam hapyrdi ki MLA ka All India Trinamool Congress (AITC) wow psiah cha ka BJP. Da ong u wa neiliang yong ka ymtye ko wow klam hajrong ini i bynta, katwa kitæ ki MLA ympu pynsñiaw ki iwon iwon cha ka party.
Kam wow kdaw heini u heh ka BJP uwa man leh u MLA ka Pynthorumkhrah, u Alexander Laloo Hek da kam u ha ki kattu katni ki khubor wa em i chong dihcha wa ki MLA ka TMC wa kynthup ya u president uwa man leh u MLA ka Nongthymmai, u Charles Pyngrope wa u Montri Rangbah warim, u Dr. Mukul Sangma, wei heini da yaklam wow psiah ki 5 ngut ki MLA ka TMC cha ka BJP.
Hawa kylli wa ini i jubab pynyoo i yei wym yatylli hapyrdi ki heh ka BJP, neiliang u president ka BJP da kyntait u yeini deiwa ong wa ka party ymye ko wow khang ya kiwon kiwon wow klam deiwa pynrap leh wa ha ki sngi wow wan ka party daw booh kyndon noh ko wow dam u klam iwon iwon cha kiwa pathai khubor.
Ha iwi i liang i klam u Hek da ong u wa kam u Montri hapoh ka sorkar ye u wow klam katwa ngait u hajrong ka phang wa i kyrdan wa ksoh u neibynta ka party wow chim rai ko.
Ha iwi i liang da ong u wa ka party pdiang lut ko ya waroh kiwa kwah wow psiah cha ka seiñ.
