U Symbood Montri Rangbah ka jylla, uwa pait leh ya ki kaam Poh-Yung (Police), u Prestone Tynsong da ong u wa ka sorkar deiwa ya krehlang wa ki pulit da kreh chitom ki wow pynkut smat yei poi i drugs chapoh ka jylla.
U Prestone da ong u wa i thang yei drugs ini wa dep man ko kam i sdang donhi wei ki paidbah daw yoo chooh chooh ki ha ki sngi wow wan.
Da ong u leh wa ki pulit ym em de thiah dem ki yow yaleh thma yei drugs wei da yaleh katwa ye yow kem ya kiwa dai drugs.
Heiyatoh won wa kitu kiwa da chah kdoh chah khoom hei pynemkaam drugs, da ong u wa emkaam wow ya krehlang kiwa chong chnong wa kiwa ha-yung ha-sem yow pyndooh noh yei poi i drugs.
Hawa kylli won yei yoh ki bru u dai laitlan yei drugs ha rood sarok kamwa da yoh u yoo ha iwi i Video wa da yoh ki bru u riñ ini wa dep, u Montri da ong u wym tip u wa kani ka bru toh kawa dai drugs.
Tangwa da kyntu u ya ki paidbah wa lada em wa suba ki iyi iyi wow wan ki chakhmat yow pyntip cha ki pulit wei yei pyrtuid yong ki daw murieh ki pulit.
Kam wow pynkynmoo wa ka bru wa chah riñ Video wa dai drugs ko ha GS Road, Shillong da yoh ki pulit wow kem kam na Them Metor wei da chem i Heroin wa chongdor Rs. 80 lak na yung wa sah ko.
Puræ leh: Yoh kem ki pulit yaka kynthai wa chah riñ Video wa dai drugs ha rood sarok
Discussion about this post