U MLA ka BJP u Sanbor Shullai da pynsñiaw u yei wym sñiawsuk yei wym tip u kamjooh wa ym em wa pyntip cha oo yei rai yong ka Party hapoh ka jylla wow lai cha ka Meghalaya Lokayukta wei heijooh i por kiwi kiwa boon ki heh hadooh kiwa yajan wa oo hapoh ka Party leh ym tip ki yeini. Heijooh i por u Shullai da ong u wa ym em kiwon kiwon kiwa em hapoh ka sorkar kiwa kyrchaan ya ki kaam baamtooh wei lada em iwon iwon i ya sñiawyaphær hapoh ka Party lane wa ki lok toh u yaklam haka rynsan wa biang.
U Shullai da ong u leh wa da klam che u yeiwa yieñ u wei kwah u leh ya kiwa yahkhmat ka Party wow yang chwa wei wow yaklam chwa chwa wow bichaar ya iyi iyi. Da ong u leh wa deilang wa kiwi ki heh ka Party daw yachem ki wa ki heh ka Party wa hakhlieh dooh, kiwa pait yaka jylla u heh ka NEDA u Himanta Biswa Sharma hadien ka Christmas yow paan yei pynche hajrong kani ka kaam.
Da ong u leh wa em boon ki kaam wa yatoh waka Party hapoh ka jylla wa kwah u yaklam wa ki heh ka Party wei hadien ini, ki heh dooh ka Party daw chim ki yaka rai wa da wanrah da kiwa yahkhmat ka Party hapoh ka jylla.
