Uwa yahkhmat ka PDF uwa man leh u Montri ha ka sorkar MDA, u Banteidor Lyngdoh da ong u wa hadooh kattæ ym pu tip kiwon na ki MLA yong ka Party kiwa da pyntikna lane pynsakhiat yei rai yong ki wow mih noh na ka Party wow yakhun na kawi won ha ka Election wow jied MLA ha u snem 2023.
Ini i jubab na u Banteidor toh hadien ki khubor wa mih wa ong wa em ki MLA ka PDF kiwa da pynkhreh wow looid noh ya ka sula ka PDF wei wow riam da ki yong kiwi ha kani ka Election kawa daw wan.
Ki pyrtuid ki MLA wa da mih ha ki khubor ki wym pu ye u pyntikna kynthup ki ya u MLA wa katni na Sohra, u Gavin Mylliem, neitæ u Jason Sawkmie Mawlong wot u Hamletson Dohling wei daw sah sa du u Banteidor hi samen.
Tangwa neiliang u Banteidor da khana u wa ha man ka yalang wa yachem para MLA, da jooh em ka yaklam wei ya kylli uwi ya uwi wei ym em itæ i yaklam wa daw mih noh wei ini wa mih khubor toh du ki khubor hamsaya wa pynmih da ki bru ha jar jiar ki Constituency.
Chooh chooh u Banteidor da ong u leh wa kam u bru uwa yieñ ha ka yurim wa kwah u wow yoo wa kani ka jylla u em ki seiñ saiñ pyrthai kam ka PDF kawa klam neibynta wow pynneh wow pynsah ya ki riti ki dustur, i mantre neibynta ka khyndaw u chyiap, ka ktien ka thylliej.
Tangwa da ong u wa lada waroh waroh u ya mih yow phet chawi ym man iwa yoosuk, tangwa dap u dei mynsien wa kmen wei sñiawskem u wa hei lai luti da chem pathan u wa boon ki kyrtong kiwa daw psiah cha ka Party khamtam hadien u Naiynñiaw neibynta wow yakhun Election na ka PDF.
Da ong u leh wym phær wa lada ki bru kheiñ ki ya ka PDF kawa dang man kam ka Party wa khian tangwa toh u kynmoo wa na ka chi joo da pynman ya ka duriaw bah wei kam uwa yahkhmat ka Party da ong u leh wa ym kwah wow phet smat tangwa dang lah wow lai suki suki.
