Ym toh u khuslai ki paidbah manda pynbna ka Assam ya ki pyrtuid NRC: Conrad

Shillong: U montri rangbah ka Meghalaya, u Conrad K Sangma da ong u wa ka sorkar da man ko kawa pynkhreh bha wow khanglaad ya ki bru na Assam wa chah kyntait ha ka thup pyrtuid yong ka National Register of Citizens (NRC) wow wan psiah ki cha kani ka jylla.

Ka sorkar Assam daw pynbna ko yaka thup pyrtuid wa khaddooh ka National Register of Citizens (NRC) mynstep ka 31 tarik, wei da em ka syier mynsien na ki paidbah ka Meghalaya wa ki bru wa ym mih pyrtuid ha ka NRC ye ki wow ku cha kani ka jylla.

Kam wow pynkynmoo wa ha ka thup pyrtuid ka NRC wa da pynmih da ka sorkar Assam ha u Naiynniaw u snem wa da dep, da em kamwa 2.9 klur ngut kiwa da mih pyrtuid kam kiwa chong chnong wa pura ka Assam na iwa boon bru kawa 3.29 klur ngut, kawa pynyoo wa palat 40 lak ngut kiwa chah kyntait ha ka thup pyrtuid ka NRC.

Hawa yaklam wa u Conrad da ong u, hanlada yaka NRC da pynkrehkaam du ha ka jylla Assam, tangwa neiliang ka sorkar Meghalaya da dep yaklam ko waka sorkar pyrdi wa ini i pynmih pyrtuid ka Assam ha ka NRC ym toh u ktah ko yaka jylla Meghalaya.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

“I sñiawthooh i wa na kani ka NRC da mih i syier mynsien wa i khuslai kawa ye u ktah ya ka jylla, tangwa ka sorkar ka da chim ko ya ki laad ki luti wei ki paidbah ym toh u khuslai ki,” da ong u Conrad.

Da pyntip u leh wa ka sorkar da phah ko ya ki bor pynlai District kiwa em ha khappood wa ka Assam wa toh u pait bniah bha ya i psiah i mih yong ki bru wei wow pyntip leh ya i long i man, da pynrap chooh chooh u wa ka chnat pulit leh ka da pynkhreh bha ko ya ki pulit wow pait khnang wym mih iwon iwon wa ym sñiaw chngaiñ.

Hawa kylli lada ka sorkar em ko i thmu wow pynkrehkaam ya ka NRC ha kani ka jylla, u montri rangbah da ong u wa hadooh katni ka Meghalaya ym em haap ko haka thup wow pynkrehkaam ya ka NRC, wei i pynkrehkaam ha jylla Assam leh man ko hadien wa da pynmih hukum ka yung bichaar.

“I long i man ha Meghalaya yaphær ko na ka jylla Assam, kamtæ i ym pu pyrkhat hadooh katni hajrong i pynkrehkaam ya ka NRC, ka yaklam ha ki por wa da dep da em ko wei dang pait bniah leh ya kani ka mat, tangwa ym pu toh won ka rai ka sorkar jylla,” da jubab u Conrad.